الماتىدا ءشوپتى جاسىل تۇسكە بوياعان: اكىمدىك تۇسىنىكتەمە بەردى

فوتو: ۆيدەودان كادر

الماتى قالاسىنداعى مەدەۋ اۋدانىندا جول جيەگىندەگى شوپتەردىڭ جاسىل تۇسكە بويالعانى تۋرالى ۆيدەو الەۋمەتتىك جەلى قولدانۋشىلارى اراسىندا قىزۋ تالقىلاندى. بۇل جايتقا قاتىستى قالا اكىمدىگى رەسمي تۇسىنىكتەمە بەردى,- دەپ حابارلايدى  qandastar.kz   Dalanews.kz-كە سىلتەمە جاساپ.

اكىمدىكتىڭ حابارلاۋىنشا, جاۋىن-شاشىننىڭ از بولۋىنا بايلانىستى ءشوپ جامىلعىسىنىڭ ەستەتيكالىق كورىنىسىن ساقتاۋ ءۇشىن تىڭايتقىش قوسىلعان ارنايى بوياعىش قولدانىلعان. مەدەۋ اۋدانىنىڭ اكىمى ەركەبۇلان ورازالين ءشوپ بويالعان اۋماققا ارنايى بارىپ, جاعدايدى باقىلاپ شىققانىن مالىمدەدى.

— بيىل قالادا جاۋىن از, اۋا رايى وتە قۇرعاق بولدى. وسىعان بايلانىستى ءبىز كليماتتىق جاعدايى ۇقساس ەلدەردەگى تاجىريبەنى زەرتتەدىك. بوياۋ رەتىندە قولدانىلعان زات — ورگانيكالىق پيگمەنتتەر نەگىزىندە جاسالعان, ۋلى ەمەس, ادام مەن جانۋار ءۇشىن قاۋىپسىز قۇرال. ول اقش, ءباا, يسپانيا مەن وڭتۇستىك كورەيا سياقتى ىستىق ەلدەردە ءجيى قولدانىلادى, — دەدى اۋدان اكىمى.

ءورازاليننىڭ ايتۋىنشا, بۇل تاجىريبە اۆتوماتتاندىرىلعان سۋارۋدان تولىق باس تارتۋ دەگەندى بىلدىرمەيدى. جاسىل ءتۇستى بوياعىش تەك كەيبىر جەرلەردە ەستەتيكالىق كورىنىس ءۇشىن قولدانىلادى.

— بۇل — ءبىز ءۇشىن جاڭا تەحنولوگيا. قازىر ونىڭ تيىمدىلىگىن بايقاپ كورۋدەمىز. ال كوگالدارعا كۇتىم جاساۋ, سۋارۋ جانە قۋاڭشىلىققا ءتوزىمدى وسىمدىكتەردى وتىرعىزۋ جۇمىستارى جالعاسادى, — دەپ اتاپ ءوتتى اكىمدىك.

ايتا كەتەيىك, بۇل ءونىمنىڭ ارنايى سەرتيفيكاتى بار جانە قازىرگى تاڭدا قالادا قولدانۋ قاۋىپسىز دەپ تانىلعان. شەشىمنىڭ باستى ماقساتى — قالا كەلبەتىنىڭ تارتىمدىلىعىن ساقتاۋ.