جاڭالىقتار
الماتىدا تاۋلى ايماقتا قۇرىلىس نورمالارىن بۇزا وتىرىپ سالىنعان ۇيلەر سۇرىلۋدە
فوتو: gov.kz
الماتى قالاسىنىڭ قالا قۇرىلىسىن باقىلاۋ باسقارماسىنىڭ مالىمەتىنشە, «جاڭارۋ» جك, 556 مەكەنجايىندا ورنالاسقان بلوكتىق تۇرعىن ۇيلەر بۇزىلىپ جاتىر, دەپ حابارلايدى qandastar.kz
ءۇي يەسىنە (جەكە تۇلعاعا) قۇرىلىس جۇمىستارى باستالعانعا دەيىن تاۋدىڭ ەتەگىن كەسىپ, تىرەۋ قابىرعاسىن تۇرعىزعانى ءۇشىن اكىمشىلىك شارالار قولدانىلىپ, بۇزۋشىلىقتاردى جويۋ تۋرالى نۇسقاما شىققان, كەيىن سوت ارقىلى ءماجبۇرلى تۇردە ورىنداتۋ تۋرالى تالاپ ارىز بەرىلگەن.
Orda.kz جازعانداي, ودان كەيىن باقشا ۇيلەرىن سالۋعا بەرىلگەن رۇقسات قۇجاتتارىنا سۇيەنە وتىرىپ, مەنشىك يەسى ەكى بلوكتىق تۇرعىن ءۇيدىڭ قۇرىلىسىن باستاعان. قۇرىلىس جۇمىستارى اياقتالعان سوڭ, نىساندى «باقشا ءۇيى» رەتىندە پايدالانۋعا بەرگەن, الايدا بۇل ءىس-ارەكەت بەكىتىلگەن ەسكيزدىك جوباعا ساي كەلمەگەن.
الماتى قالاسىنىڭ قالا قۇرىلىسىن باقىلاۋ باسقارماسى مەنشىك يەسىنە قاتىستى اكىمشىلىك شارا قولدانىپ, 2024 جىلدىڭ 16 مامىرىندا بوستاندىق اۋداندىق سوتىنا باستاپقى رۇقسات قۇجاتتارىن جويۋ جانە نىساندى ءسۇرۋ تۋرالى تالاپ ارىز تۇسىرگەن.
2025 جىلدىڭ 20 مامىرىندا سوت ىستەرى اياقتالىپ, مەنشىك يەسىنىڭ اپەللياتسيالىق شاعىمى قاناعاتتاندىرىلمادى, جانە نىساندى ءسۇرۋ تۋرالى سوت شەشىمى زاڭدى كۇشىنە ەندى.
ءۇيدى ءسۇرۋ جۇمىستارى الماتى قالاسى ادىلەت دەپارتامەنتىنىڭ سوت ورىنداۋشىلارىنىڭ قاتىسۋىمەن باستالدى.
