جاڭالىقتار
الماتىدا TikTok مەكتەبى اشىلادى
الماتىدا جاستار ساياساتى باسقارماسىنىڭ قولداۋىمەن كرەاتيۆتى جاستارعا ارنالعان TikTok مەكتەبى اشىلادى, دەپ حابارلايدى Qandastar.kz اقپارات پورتالى Almaty.tv-گە سىلتەمە جاساپ.
وقۋ باعدارلاماسى ەكى ايعا جوسپارلانعان جانە ارالاس فورماتتا وتەدى. ساباق جارتىلاي ونلاين, جارتىلاي وفلاين فورماتتا ۇيىمداستىرىلادى. كۋرستى TikTok سالاسىنىڭ مامانى, الەم بويىنشا اۋديتورياسى 23 ميلليوننان اسا وقىرمانى بار بلوگەر جۇرگىزەدى.
مەكتەپ قاتىسۋشىلارعا كونتەنت جاساۋدىڭ قىر-سىرىن جانە ونى ارىمەن دامىتۋعا باعىتتالعان. وقۋ بارىسىندا جاستار TikTok ترەندتەرىمەن, پلاتفورمانىڭ الگورتيمدەرىمەن, ستوريتەللينگ نەگىزدەرىمەن, ءتۇسىرىلىم جانە مونتاج ادىستەرىمەن تانىسادى. سونىمەن قاتار جەكە برەند قالىپتاستىرۋ مەن اۋديتوريامەن جۇمىس ىستەۋ ماسەلەلەرىنە ەرەكشە كوڭىل بولىنەدى.
الماتى قالاسى جاستار ساياساتى باسقارماسىندا اتاپ وتكەندەي, جوبا جاستاردىڭ شىعارماشىلىق الەۋەتىن ارتتىرۋعا جانە ولاردى زاماناۋي تسيفرلىق يندۋستريالارعا تارتۋعا ارنالعان ءتيىمدى الاڭ بولماق.
العاشقىلاردىڭ ءبىرى بولىپ تىركەلگەن – جاس كونتەنتمەيكەر ەرنار سەمبەكوۆ. ول بەينەجازبالار ءتۇسىرىپ جۇرگەنىمەن, قارالىم مەن جازىلۋشىلار سانىن ارتتىرۋدا قيىندىقتارعا تاپ بولۋدا.
«مەكتەپ مەن ءۇشىن كونتەنتپەن دۇرىس جۇمىس ىستەۋدى ۇيرەنۋگە ۇلكەن مۇمكىندىك. ساراپشىلاردان اقىل-كەڭەس الىپ, ءوز يدەيالارىمدى ءساتتى جوبالارعا اينالدىرۋدى ۇيرەنەمىن دەپ ۇمىتتەنەمىن», – دەدى ول.
وتىنىمدەر 6 ماۋسىمعا دەيىن قابىلدانادى.
