الماتىدا تۇرعىن ۇيدە جارىلىس بولىپ, ەر ادام قازا تاپتى

الماتىداعى تۇرعىن ۇيلەردىڭ بىرىندە بولعان جارىلىستىڭ ۆيدەوسى الەۋمەتتىك جەلىدە تارادى, دەپ حابارلايدى Qandastar.kz اقپارات پورتالى.

قالالىق توتەنشە جاعدايلار دەپارتامەنتى وقيعاعا قاتىستى العاشقى دەرەكتەرمەن ءبولىستى.

الدىن الا مالىمەت بويىنشا, جارىلىسقا گاز-اۋا قوسپاسىنىڭ تۇتانۋى سەبەپ بولعان. 1980 جىلى سالىنعان ءۇي جارىلىستان قاتتى زاقىمدانىپ, كەي بولىكتەرى قيراعان. قۇتقارۋشىلار ءۇيىندى استىنان 1949 جىلى تۋعان ەر ادامنىڭ ءمايىتىن تاپتى. قازىر وقيعانىڭ ناقتى سەبەپتەرى مەن ءمان-جايىن ارنايى قۇرىلعان تەرگەۋ توبى انىقتاپ جاتىر.

وقيعا ورنىندا جەدەل شتاب جۇمىس ىستەپ جاتىر. الماتى قالاسىنىڭ جەرگىلىكتى اتقارۋشى ورگاندارى, تجد, كينولوگيالىق قىزمەتتەر, تجم-ءنىڭ رەسپۋبليكالىق جەدەل-قۇتقارۋ جاساعى, 109 قالالىق قۇتقارۋ قىزمەتى, اپاتتار مەديتسيناسى ورتالىعى جانە وزگە دە ءوزارا ارەكەتتەسۋ قىزمەتتەرى جۇمىلدىرىلعان.

«وقيعانىڭ سەبەپتەرى مەن ءمان-جايىن جەدەل-تەرگەۋ توبى انىقتاپ جاتىر», – دەپ قوستى دەپارتامەنت وكىلدەرى.