الماتىدا تۇزەتۋ ورتالىعىنىڭ مامانى اۋتيست قىزدى قورلاعان

الماتىدا ەرەكشە بالالارعا ارنالعان تۇزەتۋ ورتالىقتارىنىڭ بىرىندە جانجال شىقتى. اۋتيزمگە شالدىققان قىزدىڭ اناسى بالاعا قاتىگەزدىك كورسەتكەن مۇعالىمدى جازالاۋدى سۇرايدى, دەپ جازدى Qandastar.kz سايتى ينفورمبيۋروعا سىلتەمە جاساپ.

الماتىداعى جەكەمەنشىك تۇزەتۋ ورتالىعىندا مۇعالىمنىڭ بالاعا اگرەسسيا كورسەتىپ جاتقان ۆيدەوسى تارادى. مامان توعىز جاسار نادياعا ايعايلايلاپ, ونى جۇلقىلاعان.

قىز ورتالىققا ساۋىردەن بەرى بارىپ ءجۇر. اناسى بالاسىنىڭ قولىنان كوگەرگەن جەرلەرىن كورگەن. ايەل بىردەن دابىل قاعىپ, بەينەجازبانى بەرۋدى سۇرادى.

«اياعىمەن باسىپ, قولىن سەرمەيدى, جۇلقىلايدى. قىزىم قولىمەن باسىن جابادى. ول ەشقاشان بۇلاي جاساماعان. ەرەكشە بالاعا ءبىر نارسەنى ۇيرەتۋگە ۇزاق ۋاقىت كەرەك, ياعني بۇل رەاكتسيانى بويىندا قالىپتاستىرعان. وسى ورتالىقتا تەرگەۋ جۇرگىزىلىپ, ماماننىڭ جازالانۋىن قالايمىن», – دەدى بالانىڭ اناسى ريزۆانگۇل ىبىرايىموۆا.

ريزۆانگۇل ادۆوكاتىمەن بىرگە ادىلدىك ورناتۋ ءۇشىن بىرنەشە ايدان بەرى قۇقىق قورعاۋ ورگاندارىنىڭ ەسىگىن قاعىپ ءجۇر.

اتالعان فاكتى بويىنشا مەدەۋ اۋداندىق پوليتسيا ءبولىمى «كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» بابى بويىنشا قىلمىستىق ءىس قوزعادى.

«قازىر وقيعانىڭ بارلىق ءمان-جايىن انىقتاۋعا, قاتىسۋشىلار مەن كۋاگەرلەردى سۇراۋعا, ساراپتامالىق قورىتىندىلاردى الۋعا باعىتتالعان جەدەل-ىزدەستىرۋ شارالارى كەشەنى جۇرگىزىلىپ جاتىر. تەرگەۋ بارىسى ەرەكشە باقىلاۋدا. ونىڭ قورىتىندىسى بويىنشا كىنالى تۇلعالار زاڭعا سايكەس جاۋاپكەرشىلىككە تارتىلادى», – دەلىنگەن حابارلامادا.

ريزۆانگۇل يبرايموۆا قازىر بالاسىن ۇيدە وقىتىپ جاتىر. وسى وقيعادان كەيىن ەرەكشە بالا مۇعالىمدەرمەن وقۋعا قورقادى.