جاڭالىقتار
الماتىدا « ۇلى دالا جورىعى» حالىقارالىق مارافونى وتەدى
فوتو: اشىق دەرەككوز
2025 جىلدىڭ مامىر ايىندا الماتى وبلىسىندا وتەتىن « ۇلى دالا جورىعى» حالىقارالىق مارافون-بايگەسىنە دايىندىق ءجۇرىپ جاتىر. 500 شاقىرىم قاشىقتىقتى قامتيتىن مارافونعا 15-كە جۋىق ەل قاتىسادى دەپ كۇتىلۋدە. رەسەي, قىرعىزستان, تۇركيا, يران, ماجارستان جانە تاعى باسقا ەلدەردەن سپورتشىلار كەلەدى, دەپ حابارلايدى qandastar.kz
بۇل شارا تەك سپورتتىق تۇرعىدان عانا ەمەس, ەلىمىزدىڭ مادەنيەتى مەن تاريحىن ناسيحاتتاۋ ماقساتىندا دا ۇلكەن ماڭىزعا يە. « ۇلى دالا جورىعى» مارافونىنىڭ ۇزاقتىعى – بەس كۇن, ال جالپى قاشىقتىق 500 كم قامتيدى. جارىس الماتى – وسكەمەن تاسجولىنداعى باقاناس كوپىرىنەن باستالادى. مارافون بارىسىندا قاتىسۋشىلار بالقاش, جامبىل, ىلە اۋداندارىنىڭ بىرنەشە اۋىلدارىن كەسىپ وتەدى. مارافون قوناەۆ قالاسىنىڭ «قارلىعاش» شاعىن اۋدانىندا اياقتالادى.
مارافون اياسىندا ۇيىمداستىرىلاتىن ماڭىزدى شارالاردىڭ ءبىرى – اسىل تۇقىمدى جىلقىلار كورمەسى. بۇل كورمەدە ۇلتتىق جىلقى تۇقىمدارى, ولاردىڭ ەرەكشەلىكتەرى مەن تاريحى تانىستىرىلادى. ۇلتتىق قولونەر كورمەسى دە مارافوننىڭ اجىراماس بولىگىنە اينالادى. قازاق حالقىنىڭ باي قولونەر مۇرالارىن كورسەتۋ ماقساتىندا ۇيىمداستىرىلاتىن بۇل كورمەدە شەبەرلەر ءوز جۇمىستارىن ۇسىنىپ, كەلۋشىلەرگە ۇلتتىق ونەردى تانىستىرادى.
«بۇل مارافون تەك سپورتتىق جەتىستىكتەرمەن شەكتەلمەيدى, ول ەلىمىزدىڭ مادەني جانە تۋريستىك الەۋەتىن كورسەتۋگە مۇمكىندىك بەرەدى. جارىس ارقىلى ءبىز الماتى وبلىسىنىڭ تاريحي جانە مادەني مۇراسىن الەمگە تانىستىرىپ, حالىقارالىق قاتىسۋشىلار مەن تۋريستەر ءۇشىن ماڭىزدى وقيعاعا اينالدىرامىز. ءبىز ءۇشىن بۇل – تەك سپورتتىق ءىس-شارا ەمەس, سونىمەن قاتار ۇلتتىق بىرەگەيلىكتى كورسەتۋ مۇمكىندىگى», – دەدى الماتى وبلىسىنىڭ سپورت باسقارماسى باسشىسىنىڭ ورىنباسارى راحمان شاحاربەك.
تۋريستەر ءۇشىن ارنايى قالاشىقتار مەن فوتوزونالار دا ۇيىمداستىرىلادى. شەتەلدەن كەلگەن قوناقتارعا ەلىمىزدىڭ مادەنيەتى مەن سالت-ءداستۇرى تۋرالى قىزىقتى ءارى كورنەكتى اقپارات ۇسىنىلادى.
« ۇلى دالا جورىعى» مارافونى ەلىمىزدىڭ سپورتتىق ءيميدجىن كوتەرىپ قانا قويماي, تۋريزم سالاسىنا دا جاڭا سەرپىن بەرەدى. الەمنىڭ ءارتۇرلى ەلدەرىنەن كەلگەن قوناقتار مەن قاتىسۋشىلار بۇل شاراعا قاتىسا وتىرىپ, قازاقستاننىڭ باي مادەني مۇراسىن تاماشالاي الادى.
