Jańalyqtar
Almatyda «Uly dala joryǵy» halyqaralyq marafony ótedi
Foto: ashyq derekkóz
2025 jyldyń mamyr aıynda Almaty oblysynda ótetin «Uly dala joryǵy» halyqaralyq marafon-báıgesine daıyndyq júrip jatyr. 500 shaqyrym qashyqtyqty qamtıtyn marafonǵa 15-ke jýyq el qatysady dep kútilýde. Reseı, Qyrǵyzstan, Túrkııa, Iran, Majarstan jáne taǵy basqa elderden sportshylar keledi, dep habarlaıdy qandastar.kz
Bul shara tek sporttyq turǵydan ǵana emes, elimizdiń mádenıeti men tarıhyn nasıhattaý maqsatynda da úlken mańyzǵa ıe. «Uly dala joryǵy» marafonynyń uzaqtyǵy – bes kún, al jalpy qashyqtyq 500 km qamtıdy. Jarys Almaty – О́skemen tasjolyndaǵy Baqanas kópirinen bastalady. Marafon barysynda qatysýshylar Balqash, Jambyl, Ile aýdandarynyń birneshe aýyldaryn kesip ótedi. Marafon Qonaev qalasynyń «Qarlyǵash» shaǵyn aýdanynda aıaqtalady.
Marafon aıasynda uıymdastyrylatyn mańyzdy sharalardyń biri – asyl tuqymdy jylqylar kórmesi. Bul kórmede ulttyq jylqy tuqymdary, olardyń erekshelikteri men tarıhy tanystyrylady. Ulttyq qolóner kórmesi de marafonnyń ajyramas bóligine aınalady. Qazaq halqynyń baı qolóner muralaryn kórsetý maqsatynda uıymdastyrylatyn bul kórmede sheberler óz jumystaryn usynyp, kelýshilerge ulttyq ónerdi tanystyrady.
«Bul marafon tek sporttyq jetistiktermen shektelmeıdi, ol elimizdiń mádenı jáne týrıstik áleýetin kórsetýge múmkindik beredi. Jarys arqyly biz Almaty oblysynyń tarıhı jáne mádenı murasyn álemge tanystyryp, halyqaralyq qatysýshylar men týrıster úshin mańyzdy oqıǵaǵa aınaldyramyz. Biz úshin bul – tek sporttyq is-shara emes, sonymen qatar ulttyq biregeılikti kórsetý múmkindigi», – dedi Almaty oblysynyń Sport basqarmasy basshysynyń orynbasary Rahman Shaharbek.
Týrıster úshin arnaıy qalashyqtar men fotozonalar da uıymdastyrylady. Shetelden kelgen qonaqtarǵa elimizdiń mádenıeti men salt-dástúri týraly qyzyqty ári kórnekti aqparat usynylady.
«Uly dala joryǵy» marafony elimizdiń sporttyq ımıdjin kóterip qana qoımaı, týrızm salasyna da jańa serpin beredi. Álemniń ártúrli elderinen kelgen qonaqtar men qatysýshylar bul sharaǵa qatysa otyryp, Qazaqstannyń baı mádenı murasyn tamashalaı alady.
