الماتىدا جالعان پوليتسەيلەر تۇرعىنداردان اقشا بوپسالاعان

الماتىدا ءوزىن پوليتسەيلەر رەتىندە تانىستىرىپ, تۇرعىنداردان اقشا بوپسالاعان ادامدار توبى ۇستالدى, دەپ حابارلايدى Qandastar.kz سايتى BAQ.KZ-كە سىلتەمە جاساپ.

ارنايى وپەراتسيا بارىسىندا كۇدىكتىلەردەن «پوليتسياعا جاردەمدەسۋ وتريادى» قوعامدىق بىرلەستىگىنىڭ جالعان قىزمەتتىك كۋالىكتەرى, قول كىسەندەرى جانە اقشا قاراجاتى تاركىلەندى. ولار وزدەرىن «ەسىرتكى پوليتسياسىنىڭ قىزمەتكەرىمىز» دەپ تانىستىرىپ, «قىلمىستىق جاۋاپكەرشىلىككە تارتامىز» دەپ قورقىتىپ, تۇرعىنداردان قولما-قول اقشا مەن اۋدارىمدار تالاپ ەتكەن.

ۇستالعانداردىڭ ۇشەۋى دە ۋاقىتشا ۇستاۋ يزولياتورىنا قامالدى. سوت ولاردى قاماۋعا الۋ تۇرىندەگى بۇلتارتپاۋ شاراسىن سانكتسيالادى. قر قىلمىستىق كودەكسىنىڭ 194-بابى («بوپسالاۋ») بويىنشا قىلمىستىق ءىس قوزعالدى.

بۇل جىل باسىنان بەرى ءوزىن پوليتسەيمىز دەپ كورسەتكەن ادامدار توبىن ءۇشىنشى رەت ۇستاۋىمىز. مۇنداي فاكتىلەر قوعامنىڭ سەنىمىنە نۇقسان كەلتىرەدى, سوندىقتان ءبىز مۇنداي ارەكەتتەردىڭ جولىن قاتاڭ كەسەمىز. شىنايى پوليتسيا قىزمەتكەرلەرى تەك زاڭ اياسىندا ارەكەت ەتەدى. الماتى تۇرعىندارىن: ءوزىن پوليتسەيمىن دەپ تانىستىرعان ادامداردىڭ ارەكەتىندە كۇمان تۋىنداسا, بىردەن «102»-گە قوڭىراۋ شالۋعا شاقىرامىن, – دەدى الماتى قالاسى پد ەسىرتكى قىلمىستارىنا قارسى ءىس-قيمىل باسقارماسىنىڭ باستىعى مۇرات جۇماباەۆ.

تەرگەۋ جالعاسۋدا, كۇدىكتىلەردىڭ زاڭعا قايشى ارەكەتتەرىنىڭ بارلىق ءمان-جايى انىقتالۋدا.