الماتىدا جەكەمەنشىك مەكتەپتەردىڭ بىرىندە وقۋشى ءوز-وزىنە قول سالدى: جەلىدە مۇعالىمدەردى قىزعا بۋللينگ جاسادى دەپ ايىپتادى

فوتو: 2gis

الەۋمەتتىك جەلىدە 2 قىركۇيەك كۇنى الماتىداعى جەكەمەنشىك مەكتەپتىڭ وقۋشىسى ءوز-وزىنە قول سالدى دەگەن اقپارات تارادى. مالىمەتكە سايكەس, سۋيتسيدكە بۋللينگ سەبەپ بولعان, دەپ جازدى qandastar.kz

پوليتسيا بۇل وقيعاعا قاتىستى تەرگەۋدى باستادى. بۇل تۋرالى Stan.kz اقپارات اگەنتتىگى حابارلايدى.

وقۋشىنىڭ سۋيتسيد جاساعانى تۋرالى جازبا جەلىدە جاريالاندى. وندا قىزدىڭ وقۋ ورنىنىڭ مۇعالىمدەرى مەن باسقا وقۋشىلاردىڭ اتا-انالارى تاراپىنان بۋللينگكە ۇشىراعانى ايتىلعان.

«2 قىركۇيەك كۇنى وقۋشى قىز مەكتەپكە ۇلكەن ىنتامەن, شابىتپەن بارادى. بىراق, ءبارى قايعىلى جاعدايمەن اياقتالادى, بۇعان كىنالى «باكالاۆريات» جەكەمەنشىك مەكتەبى. قىز 11-سىنىپ وقۋشىسى. ول مەكتەپكە بەيرەسمي ستيلدە بارعان. وسى ءۇشىن وعان مۇعالىمدەر مەن وقۋ ءىسىنىڭ مەڭگەرۋشىلەرى, ءتىپتى مەكتەپ ديرەكتورى دا ءتيىسىپ بالاعات سوزدەر ايتقان. ءتىپتى مارقۇم ومىردەن وزار الدىندا, ووقۋشىلاردىڭ ءبىرىنىڭ اناسى ونىڭ شاشىنان ۇستاپ قابىرعاعا سوققانىن جازعان. وسىلايشا قىز 2 قىركۇيەك كۇنى مەكتەپتەن قۋىلىپ, ءۇشىنشى كۇنى شاتىردان سەكىرىپ كەتكەن», – دەلىنگەن جازبادا.

فوتو: Qumash Telegram-ارنا

قايعىلى وقيعادان كەيىن جەلىدە ادىلدىك تالاپ ەتەتىن اكتسيا باستالدى. سونىمەن قاتار 2Gis-تە مەكتەپتىڭ رەيتينگىن تۇسىرۋگە شاقىراتىن ارەكەتتەر جاسالىپ جاتىر. قازىر وندا جاعىمسىز پىكىرلەر جازىلىپ, ءبىر جۇلدىزدىق باعا قويىلعان.

سكرين: 2gis

«مەنىڭ قۇربىمدى كيىم ءستيلى ءۇشىن, سىرتقى كەلبەتى ءۇشىن قورلادى. ەندى ول جوق, وعان وسى مەكتەپ كىنالى. مۇعالىم ەمەس, وزدەرىنشە «ۇستاز» بولىپ جۇرگەن ادامدار», «بولاشاق پەداگوگ ماماندىعىن وقىپ جۇرگەن ادام رەتىندە, مۇنداي ادامدار ءوزىن قالاي مۇعالىم دەپ اتايدى», «قايعىلى جاعداي جۇيەلى قىسىمنىڭ, اگرەسسيا مەن مەكتەپ اكىمشىلىگىىڭ ارەكەتسىزدىگىنىڭ سالدارى. قازىر مەكتەپ ەشتەڭە بولماعانداي جۇمىسىن جالعاستىرىپ جاتىر. وسىلايشا ولار مورالدىق جاۋاپكەرشىلىكتەن جالتارىپ وتىر.  اتا-انالار, اباي ءبولىڭىزدارا ەڭ باستىسى بالانىڭ قاۋىپسىزدىگى مەن پسيحيكالىق ساۋدىعى. بۇل ءىستى ءتيىستى ورگاندار قولعا الىپ, مۇنداي جاعدايدىڭ قايتالانۋىنا جول بەرمەيدى دەپ سەنەمىن», – دەپ جازدى ولار.

اتالعان جاعدايعا قاتىستى Stan.kz تىلشىسى الماتى قالالىق پوليتسيا دەپارتامەنتىنەن ءمان-جايدى سۇراپ ءبىلدى. ولار قىلمىستىق ءىس قوزعالعانىن مالىمدەدى.

«اتالعان دەرەك بويىنشا مەدەۋ اۋداندىق پوليتسيا باسقارماسى قىلمىستىق ءىس قوزعادى. وقيعانىڭ ءمان-جايى مەن سەبەپتەرى انىقتالىپ جاتىر», – دەلىنگەن حابارلامادا.