Almatyda jolaýshy FlyArystan qyzmetkerin soqqyǵa jyqty

Almaty halyqaralyq áýejaıynda Almaty-Astana baǵytyndaǵy FS 7057 reısiniń jolaýshysy FlyArystan qyzmetkerine judyryq ala júgirgen, dep habarlaıdy qandastar.kz

Jolaýshy tirkeý ornyna ushyp shyǵýǵa 30 mınýt qalǵanda kelip, reıske tirkelgenin rastaǵannan keıin tekserý aımaǵyna ótken. Alaıda, ol reıske úlgermeı qalǵan.

Keıin jolaýshy tirkeý aımaǵyna qaıta oralyp, tekserý aımaǵyna baǵyt kórsetken qyzmetkerge til tıgizip, onyń telefonyn laqtyryp jibergen. Artynsha, judyryq ala júgirgen.

Baspasóz qyzmeti áýe tasymaldaýshysy óz qyzmetkerlerine jáne basqa jolaýshylarǵa qatysty zorlyq-zombylyqtyń kez kelgen túrine, sonyń ishinde fızıkalyq shabýyldarǵa, qorqytýlar men balaǵat sózderge nóldik tózimdilik saıasatyn qatań ustanatynyn eske saldy.

– Destrýktıvti minez-qulyq kórsetken jolaýshy qoldanystaǵy zańnamaǵa sáıkes jaýapqa tartylady. Áýe kompanııasy sonymen qatar óz qaýipsizdik saıasaty aıasynda tıisti sharalardy qoldaný quqyǵyn, sonyń ishinde jolaýshyny qara tizimge engizý múmkindigin ózinde saqtap qalady. Biz ár jolaýshynyń óziniń minez-qulqy men basqalarǵa qurmet kórsetý normalaryn saqtaýǵa tolyq jaýapty ekenin erekshe atap ótemiz. Reıske ýaqytynda kelý – bul jolaýshynyń jeke jaýapkershiligi ekenin este ustaý mańyzdy, – dep atap ótti kompanııa baspasóz qyzmeti.