Jańalyqtar
Almatyda jyljymaıtyn múlik satyp alýdan buryn neni bilý kerek
Byltyr jyl basynan beri sottarǵa zańnama men qurylys normalarynyń talabyn buzǵany úshin 230 talap aryz joldandy. Onyń ishinde 96 nysan tolyq nemese jartylaı buzýdy talap etedi,-dep habarlaıdy Qandastar.kz
Almaty ákimdiginiń málimetinshe, buzýǵa jatatyn nysandardyń ishinde turǵyn úı keshenderi men taýnhaýstar bar. Mindetine salǵyrt qaraǵan qurylys salýshylar ondaǵy birqatar páterdi satqan. Kóbinese qurylys salýshylar qoldanystaǵy zańnamaǵa sáıkes úleskerlerdiń qarajatyn tartý úshin 3 qabatqa deıingi turǵyn úılerge ruqsat talap etilmeıtindigin paıdalanady. Bul kóbinese bastapqy jyljymaıtyn múlik naryǵyndaǵy kúmándi mámilelerge yqpal etedi. Bul jaǵdaıda tekserý men sot talqylaýyn júrgizýdiń quqyqtyq normasynda belgilengen rásimderiniń uzaqtyǵy mindetine salǵyrt qaraǵan jaýapsyz qurylys salýshyǵa zańsyz nysanda páterler men turǵyn emes úı-jaılardyń belgili bir sanyn satýǵa múmkindik beredi.
«Alaıda jyljymaıtyn múlik naryǵyndaǵy mámiledegi shyǵyndardy boldyrmaý úshin qurylys salýshydan tolyq ruqsat qujattaryn talap etý nemese Qala qurylysyn baqylaý basqarmasynyń +7 705 89 66 000 WhatsApp anyqtamalyq arnasy arqyly tıisti qujattarynyń bar-joǵy týraly senimdi aqparat alý qajet ekenin umytpaǵan jón. Qala qurylysy jáne ýrbanıstıka basqarmasynan qurylys salýshydan úleskerlerdiń qarajatyn tartýǵa ruqsattyń bolýy týraly aqparat alýǵa bolady»,- dep atap ótti ákimdikten.
Eger tutynýshy jyljymaıtyn múlikti zańsyz nysanda satyp alsa, qurylys salýshy qarajatty qaıtarýdan bas tartqan jaǵdaıda Almaty qalasy boıynsha Ekonomıkalyq tergeý departamentine jáne quqyq qorǵaý organdaryna ótinishpen júginýi kerek.
Basqarma sonymen qatar osy nysandardyń birqatary nelikten jartylaı salynǵanyn jáne olardyń qurylysy bastapqy kezeńde qandaı sebeppen toqtatylmaǵanyn túsindirdi.
«Qazirgi tańda sáýlet-qurylys baqylaý organdary qurylys nysandaryna kedergisiz barý quqyǵynan aıyryldy. Jospardan tys tekserýler QR Kásipkerlik kodeksimen reglamentteledi jáne tek resmı ótinish negizinde júrgiziledi. Osylaısha, zańsyz qurylys faktisin tirkeý jáne qurylys salýshyǵa shara qoldaný úshin jospardan tys tekserý júrgizý qajet», – delingen habarlamada.
