الماتىداعى ارباتتا ەس-ءتۇسسىز جاتقان ءبىر توپ ءجاسوسپىرىم جۇرتتى شوشىتتى

ۆيدەودان سكرين

الماتىداعى ارباتتا ەس-ءتۇسسىز جاتقان ءبىر توپ ءجاسوسپىرىم جۇرتتى شوشىتتى, دەپ جازادى qandastar.kz

بۇل تۋرالى Stan.kz اقپارات اگەنتتىگى ينفورمبيۋرو باعدارلاماسىنا سىلتەمە جاساپ حابارلايدى.

جاسوسپىرىمدەردىڭ ارەكەتىن تۇرعىندار ۆيدەوعا ءتۇسىرىپ العان. ۆيدەودان جاسوسپىرىمدەردىڭ باس كوتەرە الماي وتىرعانىن, كەيبىرەۋلەرىنىڭ جەردە سۇلاپ جاتقانىن كورۋگە بولادى.

ۆيدەونى كورگەن جۇرت جەتكىنشەكتەر «ەسىرتكى قولدانعان» دەپ ويلاسا دا, پوليتسيا كامەلەتكە تولماعان بالالار ماساڭ كۇيدە بولعانىن مالىمدەدى. الماتى قالاسىنىڭ بالالار ومبۋدسمەنى ديانا ەرلاننىڭ ايتۋىنشا, ەكى ءجاسوسپىرىم الكوگولدەن ۋلانۋ بەلگىلەرىمەن قالالىق بالالار اۋرۋحاناسىنا جىبەرىلگەن.

پوليتسيا دەپارتامەنتىنىڭ مالىمەتىنشە, وقيعا ورنىندا 5 ءجاسوسپىرىم ماس كۇيىندە انىقتالعان جانە ولارعا تەز ارادا مەديتسينالىق كومەك كورسەتىلگەن.

«قازىرگى ۋاقىتتا تەكسەرىس جۇرگىزىلىپ جاتىر. جاسوسپىرىمدەردىڭ قالاي الكوگول تۇتىنعانى, كىممەن بىرگە بولعانى جانە سپيرتتىك ىشىمدىكتى قايدان العانى انىقتالۋدا. پوليتسيا, كامەلەتكە تولماعانداردىڭ قاۋىپسىزدىگى مەن ءتارتىبى ءۇشىن ءبىرىنشى كەزەكتە اتا-انالار جاۋاپتى ەكەنىن ەسكەرتەدى», – دەدى الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەك.

جاسوسپىرىمدەردى قاراۋسىز قالدىرعانى ءۇشىن ولاردىڭ اتا-انالارىنا زاڭناماعا سايكەس شارا قولدانىلدى. ال بالالارعا ىشىمدىك ساتقاندار ءالى دە ىزدەستىرىلۋدە. ولار تابىلعان جاعدايدا اكىمشىلىك قۇقىقبۇزۋشىلىق ءۇشىن جاۋاپقا تارتىلادى.