الماتىلىق الپينيستەردى ىزدەۋ جۇمىستارى توقتاتىلدى

قىرعىزستاننىڭ تيان-شان تاۋلارىندا جوعالىپ كەتكەن الپينيستەردى ىزدەۋ توقتاتىلدى. بۇل تۋرالى قر قورعانىس مينيسترلىگى اقپارات جانە كوممۋنيكاتسيالار دەپارتامەنتىنىڭ باسشىسى دانيار ايجانوۆ ايتتى, دەپ حابارلايدى قازاقپارات ءتىلشىسى. «جوعالىپ كەتكەن الپينيستەردى ىزدەۋگە شىققان اسكەري الپينيستەر قايتىپ كەلدى. بۇعان دەيىن اق-ساي ترەۆەل كومپانياسى بولعان اپاتتىڭ حرونيكاسىن ايتىپ, الپينيستەردى ءتىرى تابۋعا مۇمكىندىك جوق ەكەنىن ايتقان ەدى», – دەدى دانيار ايجانوۆ اتالعان ماسەلەگە قاتىستى وتكەن ءباسپاسوز ءماسليحاتىندا. ەسكە سالساق, الماتىلىق مۇرات وتەپباەۆ, اندرەي كورنەەۆ جانە كوز جۇمعان الەكساندر چەچۋلين قىرعىزستانداعى «جەڭىس» شىڭىندا قارلى بورانىڭ استىندا قالعان. الماتى قالاسىنىڭ اكىمى باقىتجان ساعىنتاەۆ تاۋدا قازاقستاندىق الپينيستەر توبىنىڭ جوعالىپ كەتۋىنە قاتىستى Instagram پاراقشاسىندا الاڭداۋشىلىق ءبىلدىردى. كەيىنىرەك جوعالعان الپينيستەردىڭ ءبىرىنىڭ قىزى الەۋمەتتىك جەلى ارقىلى قالىڭ كوپشىلىكتەن كومەك سۇرادى. سونداي-اق, قر قورعانىس مينيسترلىگى الپينيستەردى قۇتقارۋ وپەراتسياسىن باستادى. قر قارۋلى كۇشتەرىنىڭ اسكەري قىزمەتشىسى, كاپيتان ماقسۇت جۇماەۆ قىرعىزستان تاۋلارىندا جوعالعان قازاقستاندىق الپينيستەردى ىزدەستىرۋ جۇمىستارى تۋرالى ايتقان بولاتىن. اۋا رايىنىڭ قولاسىزدىعى الماتىلىق الپينيستەردى ىزدەۋگە كەدەرگى كەلتىردى.

دەرەككوز: inform.kz