الماتىلىق كەلىنشەك سىياقى ءۇشىن جۇزدەگەن ابونەنتتىك ءنومىردى ءوز اتىنا تىركەگەن

الماتىدا ينتەرنەت-الاياقتىققا ارنالعان SIM-كارتالاردى بەلسەندىرۋ سحەماسى اشكەرەلەندى, — دەپ حابارلايدى Qandastar.kz اقپاراتتىق پورتالى.

الماتى قالاسىنىڭ پوليتسەيلەرى ينتەرنەت-الاياقتىقپەن بايلانىستى جاسىرىن سىزبانى انىقتاپ, ونىڭ جولىن كەستى. جەدەل-ىزدەستىرۋ ءىس-شارالارى بارىسىندا قۇقىق قورعاۋ ورگاندارى مەسسەندجەرلەردەگى اككاۋنتتاردى تىركەۋ جانە ولاردى ءۇشىنشى تۇلعالارعا تاپسىرۋ ءۇشىن پايدالانىلعان SIM-كارتالار مەن ءموبيلدى قۇرىلعىلاردى جاپپاي ساتىپ العان ايەلدى ۇستادى.

تەكسەرۋ ناتيجەسىندە بەلگىلى بولعانداي, بۇل سحەمالار الاياقتاردىڭ ءانونيمدى ارەكەت ەتۋىنە مۇمكىندىك بەرگەن. ولار ءوزىن مەملەكەتتىك ورگان نەمەسە بانك قىزمەتكەرى رەتىندە تانىستىرىپ, ازاماتتاردى الداعان.

ۇستالعان ايەل «جەڭىل تابىس» تۋرالى حابارلاماعا جاۋاپ بەرىپ, سىياقى ءۇشىن جۇزدەگەن ابونەنتتىك نومىرلەردى ءوز اتىنا راسىمدەگەنىن مويىندادى. ءدال وسى نومىرلەر ارقىلى بىرنەشە قىلمىستىق ىستەرگە قاتىسى بار قوڭىراۋلار جاسالعانى انىقتالدى.

— SIM-كارتالار, پوشتالار, بانك جانە مەسسەندجەر اككاۋنتتارىمەن بايلانىستى كەز كەلگەن «ۇيدەن جۇمىس» ۇسىناتىن حابارلامالار – بۇل جوعارى قاۋىپتىلىك بەلگىسى. ادام مۇنداي ارەكەتتەر ارقىلى ءوز ەركىنەن تىس قىلمىستىق ارەكەتكە ارالاسىپ كەتۋى مۇمكىن. سوندىقتان مۇنداي ۇسىنىستارعا ساقتىقپەن قاراپ, ارتىندا قانداي ماقسات تۇرعانىن تەرەڭ ويلاعان ءجون, – دەدى الماتى قالالىق پد كيبەرقىلمىسپەن كۇرەس باسقارماسىنىڭ باستىعى انەس قالدىباەۆ.