Almatylyq kelinshek syıaqy úshin júzdegen abonenttik nómirdi óz atyna tirkegen

Almatyda ınternet-alaıaqtyqqa arnalǵan SIM-kartalardy belsendirý shemasy áshkerelendi, — dep habarlaıdy Qandastar.kz aqparattyq portaly.

Almaty qalasynyń polıeıleri ınternet-alaıaqtyqpen baılanysty jasyryn syzbany anyqtap, onyń jolyn kesti. Jedel-izdestirý is-sharalary barysynda quqyq qorǵaý organdary messendjerlerdegi akkaýnttardy tirkeý jáne olardy úshinshi tulǵalarǵa tapsyrý úshin paıdalanylǵan SIM-kartalar men mobıldi qurylǵylardy jappaı satyp alǵan áıeldi ustady.

Tekserý nátıjesinde belgili bolǵandaı, bul shemalar alaıaqtardyń anonımdi áreket etýine múmkindik bergen. Olar ózin memlekettik organ nemese bank qyzmetkeri retinde tanystyryp, azamattardy aldaǵan.

Ustalǵan áıel «jeńil tabys» týraly habarlamaǵa jaýap berip, syıaqy úshin júzdegen abonenttik nómirlerdi óz atyna rásimdegenin moıyndady. Dál osy nómirler arqyly birneshe qylmystyq isterge qatysy bar qońyraýlar jasalǵany anyqtaldy.

— SIM-kartalar, poshtalar, bank jáne messendjer akkaýnttarymen baılanysty kez kelgen «úıden jumys» usynatyn habarlamalar – bul joǵary qaýiptilik belgisi. Adam mundaı áreketter arqyly óz erkinen tys qylmystyq áreketke aralasyp ketýi múmkin. Sondyqtan mundaı usynystarǵa saqtyqpen qarap, artynda qandaı maqsat turǵanyn tereń oılaǵan jón, – dedi Almaty qalalyq PD kıberqylmyspen kúres basqarmasynyń bastyǵy Ánes Qaldybaev.