الماتىلىق كوممۋنالدىق قىزمەت بۋحگالتەرى 58 ميلليون تەڭگە جىمقىردى دەپ ايىپتالدى

فوتو:سكرين

الماتى قالاسىنىڭ تۇرعىندارى كوممۋنالدىق قىزمەتتە جۇمىس ىستەگەن بۋحگالتەردى ءىرى كولەمدە الاياقتىق جاسادى دەپ ايىپتاپ وتىر. ولاردىڭ ايتۋىنشا, ايەل قوممۋنالدىق قىزمەت قاراجاتىنان 58 ميلليون تەڭگەنى جىمقىرىپ, جەكە قاجەتتىلىكتەرىنە جۇمساعان. سونىڭ سالدارىنان ءبىر تۇرعىن ءۇي كەشەنىنىڭ تۇرعىندارى جوندەۋ جۇمىستارىنان قاعىلىپ, تۇرمىستىق قيىندىقتارعا تاپ بولدى: ءتورت قاباتتى ۇيلەردە ءجيى جارىق ءوشىپ, جەرتولەنى سۋ باسىپ, شاتىردان سۋ اققان. اتالعان ماسەلەلەردى شەشۋگە ارنالۋعا ءتيىس قارجى بوتەن بىرەۋدىڭ شوتىندا جاتىر, دەپ جازدى qandastar.kz

بۇل تۋرالى Stan.kz اقپارات اگەنتتىگى كتك تەلەارناسىنا سىلتەمە جاساپ حابارلايدى.

«مەدەۋ» تۇرعىن ءۇي كەشەنىنىڭ ەلۋگە جۋىق تۇرعىنى جينالىسقا جينالدى. كۇن تارتىبىندە – ءىرى كولەمدەگى ۇرلىق. تۇرعىندار ءۇي ىشىندەگى جەلىلەردى جوندەۋگە دەپ جيناعان اقشانىڭ جوعالىپ كەتكەنىن ايتادى. كوممۋنالدىق قىزمەت  توراعاسى رىسكەلدى سادەرمەكوۆتىڭ سوزىنشە, قاراجاتتى بۋحگالتەر يەمدەنىپ كەتكەن. ارىپتەسىنە العاش كۇدىك كەلتىرگەن دە توراعانىڭ ءوزى ەكەن. ول بانك ۇزىندىلەرىن سۇراتىپ الىپ, بۋحگالتەردىڭ تۇرعىندار اقشاسىن ءوز جەكە شوتىنا اۋدارىپ وتىرعانىن انىقتاعان.

«اقشا جەتپەيدى. قايدا كەتتى بۇل اقشا? جالاقىنى دا كەش الامىز, كەيدە 10-ى, كەيدە 15-ءى كۇنى. سودان كۇدىك تۋدى. سويتسەم, بۋحگالتەرىمىز ۆيكتوريا سانچيلو ءوزى ءۇشىن جەكە كاسىپكەرلىك اشىپ, كوممۋنالدىق قىزمەتتىڭ بارلىق اقشاسىن سول جەكە كاسىپكەرلىككە اۋدارىپ وتىرعان», – دەدى رىسكەلدى سادەرمەكوۆ.

كوممۋنالدىق قىزمەت وكىلدەرى بۇل دەرەكتى اۋديتورلىق تەكسەرىس تە راستاعانىن ايتادى. تەكسەرۋدەن كەيىن ءۇش جىل ىشىندە بۋحگالتەر ەسەپتەگىش قۇرالدارعا تولەم جاساعان بولىپ, شامامەن 58 ميلليون 282 مىڭ تەڭگەنى ءوز شوتىنا اۋدارعانى بەلگىلى بولعان. قۇجاتتاردا «ەسەپتەگىش قۇرالدارعا تولەم» دەپ كورسەتىلگەن. بىراق ءار پاراقتا وسىنداي جازبا.

تۇرعىن حاديشا تاسىباەۆانىڭ ايتۋىنشا, بۇل اقشا ۇيلەردىڭ شاتىرىن جوندەپ, جارىق جۇيەسىن قالپىنا كەلتىرۋگە جۇمسالۋعا ءتيىس بولعان. الايدا قازىر جاعداي وتە مۇشكىل: شاتىردان سۋ اعىپ, جارىق ءسونىپ تۇرادى, ال جەرتولەلەردى سۋ باسقان.

«پودەزدە كاناليزاتسيا ءيىسى مۇڭكىپ تۇر. ءبىرىنشى قاباتتا تۇراتىن مەن تەرەزە اشا المايمىن. كوممۋنالدىق قىزمەتىنە قوڭىراۋ شالامىن, بىراق ەشقانداي ارەكەت جوق. ءوزىم ارنايى ءتۇسىپ كورسەم, لاس قالدىقتار جەرتولەدە جاتىر. كەلىپ, حلور شاشقاندا ءبارى شىج-شىج قايناپ جاتتى. ءبىز سونى جۇتىپ ءجۇرمىز», – دەدى حاديشا تاسىباەۆا.

كوبىنىڭ تۇسىنبەيتىنى – بۋحگالتەردىڭ ءوزى دە وسى ۇيدە تۇرادى. ياعني جاعدايدى ءوز كوزىمەن كورىپ وتىر. الماتىلىق ولگا لوتورەۆانىڭ ايتۋىنشا, بىرنەشە رەت تانىسىن ار-ۇياتقا شاقىرىپ كورگەن, بىراق ايەل تىڭداۋدان باس تارتقان.

«اقشا الدىڭ با? ساعان اقشا جىمقىردى دەپ ايىپ تاعىلۋدا. الدىڭ با?» دەپ سۇرادىق. ول: ء«يا, الدىم» دەدى. شوك بولدىق. «ساعان بۇل ميلليوندار نەگە كەرەك بولدى?» دەدىك. ول: «سول اقشامەن ءومىر ءسۇردىم» دەدى. ءتۇرى – ءمىز باقپايدى, بەتى قالىڭ. ياعني, ول بۇل ارەكەتتى ادەيى جاساعان», – دەدى ولگا لوتورەۆا.

تۇرعىنداردىڭ ايتۋىنشا, باستاپقىدا بۋحگالتەر اقشانى قايتارامىن دەپ ۋادە بەرگەن. الايدا ءۇش اي ءوتتى – كووپەراتيۆ شوتىنا ءبىر تيىن دا تۇسپەگەن. قازىر ول مۇلدە بايلانىسقا شىقپاي قويعان.

تۇرعىندار ەندى ونىڭ اقشانى قايتارمايتىنىنا كوز جەتكىزگەن. سوندىقتان ءبارى بىرىگىپ پوليتسياعا ارىز جازعان.

«بوستاندىق اۋدانى پوليتسيا باسقارماسى كوممۋنالدىق قىزمەتىنە سەنىپ تاپسىرىلعان م ۇلىكتى يەمدەنۋ جانە تالان-تاراجعا سالۋ دەرەگى بويىنشا قىلمىستىق ءىس قوزعادى. قازىر تەرگەۋ اياسىندا جان-جاقتى جانە وبەكتيۆتى تەكسەرۋ ءۇشىن كەشەندى تەرگەۋ ارەكەتتەرى جۇرگىزىلىپ جاتىر. سونىمەن قاتار ءتىنتۋ جۇمىستارى دا قولعا الىنعان», — دەدى الماتى پوليتسيا دەپارتامەنتى.

قازىر بۋحگالتەر جۇمىستان شىعارىلدى. تۇرعىندار ونىڭ ۇرلانعان اقشامەن بىرگە قوناەۆ قالاسىنا كەتىپ قالعانىنان قاۋىپتەنىپ وتىر. ساقتىق ءۇشىن ولار پروكۋراتۋراعا دا ارىز جازعان.

ەسكە سالايىق, بۇعان دەيىن قازاقستاندا كوپقاباتتى ۇيلەردى باسقارۋ جۇيەسىن اۋقىمدى رەفورما كۇتىپ تۇرعانىن جازدىق. ءماجىلىس زاڭ جوبالارىن قاراستىرىپ, وعان سايكەس پاتەر يەلەرى كووپەراتيۆىنەن تۇپكىلىكتى باس تارتۋدى جوسپارلاپ وتىر. ماجىلىستە تۇرعىن ءۇي-كوممۋنالدىق شارۋاشىلىق جۇيەسىن رەفورمالاۋعا باعىتتالعان ءۇش زاڭ جوباسى قارالدى. ولاردىڭ قاتارىندا تۇرعىن ءۇي قاتىناستارى, سالىقتىق رەتتەۋ جانە وسى سالاداعى اكىمشىلىك قۇقىق بۇزۋشىلىقتار تۋرالى زاڭناماعا وزگەرىستەر مەن تولىقتىرۋلار ەنگىزىلگەن. تالقىلانىپ جاتقان وزگەرىستەر كوپپاتەرلى ۇيلەردى باسقارۋ مەحانيزمىنە, سالىق سالۋعا, زاڭ بۇزۋشىلىقتار ءۇشىن جاۋاپكەرشىلىككە اسەر ەتەدى.