الماتىلىق قۋىرشاق تەاترى كانادا تورىندە كورەرمەندەردى تامساندىردى

الماتى مەملەكەتتىك قۋىرشاق تەاترى كانادا مەملەكەتى وتتاۆا قالاسىندا وتكەن ءى-ءشى حالىقارالىق «وتتاۆا» قۋىرشاق تەاترلار فەستيۆالىنە تۇڭعىش رەت قاتىسىپ, «رومەو مەن دجۋلەتتا» قويىلىمى ءۇشىن گران-پريجۇلدەسىنە يە بولدى!

سولتۇستىك امەريكا ماتەريگىنىندە ورنالاسقان, جەر اۋماعى بويىنشا دۇنيەجۇزى ەلدەرى اراسىندا ەكىنشى ورىندا ورنالاسقان, تابيعاتى مەن مادەنيەتى كۇللى الەم بويىنشا كوپتەگەن ادامداردى قىزىقتىراتىن كانادا مەملەكەتىنىڭ استاناسى وتتاۆا قالاسىندا تۇڭعىش رەت ءى-ءشى حالىقارالىق «وتتاۆا» قۋىرشاق تەاترلار فەستيۆالى جازدىڭ شۋاقتى دا كورىكتى شىلدە ايىندا وتكىزىلدى.

كانادالىق كورەرمەندەرگە دۇنيەجۇزىنىڭ قۋىرشاق ونەرلەرىن تانىستىرىپ, حالىقارالىق شىعارماشىلىق پەن ىنتىماقتاستىقتى كوزدەگەن مادەني ءىس-شاراعا ەلىمىزدىڭ كوك تۋىن ۇستاپ قاتىسقان العاشقى قازاقستاندىق ونەر ءورداسى الماتى مەملەكەتتىك قۋىرشاق تەاترى بولدى. اتالمىش تەاتردىڭ شىعارماشىلىق ۇجىمى فەستيۆال اياسىندا كانادالىق كورەرمەندەردىڭ نازارىنا ءوز رەپەرتۋارىنداعى ەرەكشە قويىلىمداردىڭ ءبىرى, اعىلشىن دراماتۋرگى ۋيليام شەكسپيردىڭ ايگىلى تراگەدياسى جەلىسىمەن ساحنالانعان, نازىك تە تازا ماحابباتتىڭ قۇدىرەتىن سەزدىرەتىن «رومەو مەن دجۋلەتتا» سپەكتاكلىن ۇسىندى.

قۋىرشاق تەاترىنىڭ رەپەرتۋارىنداعى «رومەو مەن دجۋلەتتا» سپەكتاكلى 2019 جىلى بەلگىلى رەجيسسەر دينا جۇماباەۆانىڭ جەتەكشىلىگىمەن جارىققا شىقتى.

ەرەسەكتەرگە ارنالعان بۇل قويىلىم ءوزىنىڭ ەرەكشە قۋىرشاقتارىمەن جانە ساحنالىق شەشىمدەرىمەن پرەمەراسى وتكىزىلگەن كەزدەن باستاپ كوپشىلىك كورەرمەندەر مەن تەاتر سىنشىلارىنىڭ جوعارعى باعاسىن يەلەنگەن ەدى.

ءبىرتالاي حالىقارالىق جانە رەسپۋبليكالىق دەڭگەيدەگى تەاتر فەستيۆالدەرىندە دە باق سىناپ, بۇل قويىلىم قۋىرشاق تەاترىنىڭ ابىرويىن اسقاقتاتقان. مىسالى, 2022 جىلى اتالمىش سپەكتاكل بولگاريا رەسپۋبليكاسى ۆارنا قالاسىندا وتكەن حالىقارالىق «التىن دەلفين» قۋىرشاق تەاترلار فەستيۆالىندە ۇزدىك دەپ تانىلىپ «گران-پري» جۇلدەسىنە, «ەڭ ۇزدىك ەر ادام» جۇلدەسىنە, «ەڭ ۇزدىك دەبيۋت» جۇلدەسىنە لايىقتى بولعان. ال وعان دەيىن 2021 جىلى قاراعاندى قالاسىندا وتكىزىلگەن جانە كوبىنە وتاندىق درامالىق تەاتر ۇجىمدارى قاتىسقان اشىربەك سىعاي اتىنداعى «سىن – شىن بولسىن» رەسپۋبليكالىق تەاترلار فەستيۆالىندە ءى-ءشى ورىندى جەڭىپ العان. سونىمەن قاتار «رومەو مەن دجۋلەتتانىڭ» وزگە دە فەستيۆالدىك جەتىستىكتەرى مەن جەڭىستەرى جەتىپ جاتىر.

كوركەمدىك دەڭگەيىنىڭ جوعارى بولۋىنا بايلانىستى كانادالىق كورەرمەن نازارىنا ۇسىنعان بۇل قويىلىم مەملەكەت استاناسىنىڭ ورتالىعىندا ورنالاسقان وتتاۆا ۋنيۆەرسيتەتىنىڭ «Academic Hall» ساحناسىندا 3-ءى جانە 4-ءشى شىلدە كۇندەرى ساحنالاندى. كانادالىق ازاماتتار دا, اتالمىش ەلدە تۇرىپ جاتقان وتانداستارىمىز بەن قانداستارىمىز دا سپەكتاكلدى تاماشالاپ, زور قوشەمەت پەن جىلى لەبىزدەرىن ءبىلدىردى.

قازاقستان رەسپۋبليكاسىنىڭ كاناداداعى توتەنشە جانە وكىلەتتى ەلشىسى داۋلەتبەك قۇسايىنوۆ فەستيۆال اياسىندا قۋىرشاق تەاترىنا قولداۋ ءبىلدىرىپ.
«رومەو مەن دجۋلەتتا» سپەكتاكلىن تاماشالاپ:

«ءبىزدىڭ جاستار وتە جوعارى دەڭگەيدە جۇمىس كورسەتتى جانە وتە قىزىق ماحاببات حيكاياسىن سەزىندىردى. ءوز دارىندارىن, جالپى قازاق جاستارىنا ءتان تالانتتى كانادا حالقىنا تانىستىردى», – دەپ باعالاپ ءوتتى.

ال كانادانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى الان حامسونبولسا: «ارتيستەردىڭ تاماشا ونەرىنە كۋا بولدىم. «رومەو مەن دجۋلەتتانىڭ» وسى ءبىر ينتەرپريتاتسياسى ءبىزدى قاتتى تاڭعالدىردى!», –دەپ پىكىر ءبىلدىردى. فەستيۆال سوڭىندا الماتى مەملەكەتتىك قۋىرشاق تەاترىنىڭ «رومەو مەن دجۋلەتتا» سپەكتاكلى ەڭ ۇزدىك ءارى ەڭ تابىستى دەپ تانىلىپ, «گران-پري» جۇلدەسىنە يە بولدى. ءى-ءشى حالىقارالىق «وتتاۆا» قۋىرشاق تەاترلار فەستيۆالى اياسىندا قۋىرشاق تەاترىنىڭ ارتيستەرى قازاق قۋىرشاق ونەرىنىڭ, قازاق تەاترى ونەرىنىڭ, جالپى قازاق حالقىنىڭ ونەرلىلىگىن ساحنا تورىندە اسقاقتاتىپ, زور شابىتقا كەنەلدى.