الماتىلىق قىزدى بەلگىلى سپورتشى سوققىعا جىققانى تۋرالى حابار تارادى

فوتو: كوللاج: Tengrinews.kz/ تۇرار قازانعاپوۆ, egovpress

الماتىلىق تۇرعىن ونى بەلگىلى سپورتشى سوققىعا جىققانىن مالىمدەدى. پوليتسيا بۇل دەرەككە قاتىستى پىكىر ءبىلدىردى, – دەپ حابارلايدى Massaget.kz ءتىلشىسى.

بۇل جايلى اقپارات تەلەگرامدا پايدا بولدى. الماتىلىق قىزدىڭ سوزىنشە, ونى سۋ دوبى بويىنشا سپورت شەبەرى سوققىعا جىققان.

الماتىلىق قىز ورتا دارەجەدەگى جاراقاتتار العانىن ايتادى. بوستاندىق اۋدانىنىڭ پوليتسيا باسقارماسى بۇل دەرەككە قاتىستى قىلمىستىق ءىس قوزعاعانىمەن تەرگەۋشى جارتى جىلدان بەرى شارا قولدانباي وتىرعان كورىنەدى.

بۇل دەرەككە قاتىستى پوليتسيا دەپارتامەنتىندەگىلەر پىكىر ءبىلدىردى. بوستاندىق اۋدانىنىڭ پوليتسيا باسقارماسى قىلمىستىق ءىس قوزعاپ, تەرگەۋ شارالارى جۇرگىزىلىپ جاتىر ەكەن.

«تەرگەۋ ناتيجەسى بويىنشا كىنالى ادام انىقتالىپ, جاۋاپقا تارتىلادى. ءىس ماتەريالدارى سوتقا بەرىلەدى», – دەلىنگەن حابارلامادا.