الماتىلىقتىڭ بانكتى توناماق بولعان ءساتى ۆيدەوعا ءتۇسىپ قالدى

فوتو: ۆيدەودان سكرينشوت

الماتىدا ءبىر ەر ادام بانك عيماراتىنا تەرەزە ارقىلى كىرىپ توناماق بولدى دەگەن كۇدىككە ءىلىندى. كۇدىكتى كاسساعا ءوتۋ ءۇشىن بروندالعان اينەكتى سىندىرا الماعان سوڭ وقيعا ورنىنان قاشىپ كەتكەن. پوليتسەيلەر ونى ءىزىن سۋىتپاي ۇستادى, دەپ جازدى qandastar.kz

تسەنتركرەديت بانكى وكىلدەرى الماتىداعى بولىمشەسىن بەلگىسىز بىرەۋ توناۋعا ارەكەتتەنگەنىن راستادى. بۇل تۋرالى Stan.kz اقپارات اگەنتتىگى حابارلايدى.

الماتى قالالىق پوليتسيا وكىلدەرىنىڭ مالىمدەۋىنشە, قىلمىس ارەكەتى تۇندە جاسالعان.

«بەلگىسىز ەر ادام عيماراتقا تەرەزە ارقىلى كىرىپ, ودان كەيىن كاسساعا وتپەك بولعانىمەن, بروندالعان شىنىدان وتە الماعان. بۇل ارەكەتتىڭ بەكەر ەكەنىن تۇسىنگەن قاسكوي وقيعا ورنىنان كەتىپ قالعان», – دەيدى جەتىسۋ اۋداندىق پوليتسيا باسقارماسىنىڭ باستىعى جانىبەك شىناسىلوۆ.

جەدەل-ىزدەستىرۋ ءىس-شارالارىنىڭ ناتيجەسىندە 32 جاستاعى كۇدىكتى انىقتالىپ, ۇستالعان.

«اۋداندىق جەدەل قىزمەتكەرلەر مەن ءبىزدىڭ بولىمشەنىڭ قىزمەتكەرلەرىنىڭ كەلىسىلگەن جۇمىسىنىڭ ارقاسىندا ۇرلىق جاساۋ ارەكەتى ء«ىزىن سۋىتپاي» اشىلدى. بۇل – پروفيلاكتيكالىق بەينەباقىلاۋدىڭ تيىمدىلىگىنىڭ جانە قىزمەتكەرلەرىمىزدىڭ جەدەل ارەكەت ەتۋىنىڭ جارقىن مىسالى. ءبىز جاڭا تەحنولوگيالار مەن تسيفرلىق مۇمكىندىكتەردى بەلسەندى تۇردە قولدانامىز.

كۇدىكتى ءوز كىناسىن مويىندادى. بۇل دەرەك بويىنشا قىلمىستىق ءىس قوزعالدى», — دەپ مالىمدەدى الماتى قالالىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى تالانت يساەۆ.

تسەنتركرەديت بانكى وكىلدەرى الماتىداعى بولىمشەسىن توناۋ ارەكەتى جاسالعانىن راستادى. بانكتىڭ PR ديرەكتورى ساكەن نىعماشەۆ قۇقىق قورعاۋ ورگاندارى ارەكەتىنىڭ ارقاسىندا قىلمىسقا جول بەرىلمەگەنىن اتاپ ءوتتى. بانك قالىپتى رەجيمدە جۇمىس ىستەپ تۇر.

«كليەنتتەردىڭ مۇلكىنە زيان كەلگەن جوق. بانك ادەتتەگى رەجيمدە جۇمىس ىستەپ تۇر. قۇقىق قورعاۋ قىزمەتكەرلەرىنە جەدەل جۇمىس ىستەگەنى ءۇشىن العىس ايتامىز», — دەدى بانك وكىلى.