جاڭالىقتار
التى بالانى ورتتەن قۇتقارعان شىمكەنتتىك تۇرعىن باسپانالى بولدى
ناۋرىز مەرەكەسىنىڭ قارساڭىندا شىمكەنت قالاسىنىڭ اكىمى عابيت سىزدىقبەكوۆ مەملەكەت باسشىسىنا حات جازعان سوفيا ۋركۋمباەۆا مەن التى بالانى ورتتەن قۇتقارعان مارينا گافاروۆاعا پاتەر كىلتىن تابىس ەتتى.
جاڭا جىل قارساڭىندا وتكەن «تىلەكتەر شىرشاسى» ءداستۇرلى اكتسياسىندا سوفيا ۋركۋمباەۆا پرەزيدەنتتىڭ اتىنا حات جازعان بولاتىن. جالدامالى پاتەردە اكەسىمەن بىرگە تۇراتىنىن ايتقان كىشكەنتاي قىز پرەزيدەنتتەن پاتەر سۇراعان. بۇگىن سوفيانىڭ تىلەگى ورىندالىپ, ءۇش بولمەلى پاتەرگە يە بولدى.
سونىمەن قاتار, عابيت سىزدىقبەكوۆ التى بالانى ءورت ىشىنەن الىپ شىققان مارينا گافاروۆاعا دا ءتورت بولمەلى پاتەردىڭ كىلتىن تابىستادى.
وتكەن جىلدىڭ 16 جەلتوقسانىنا قاراعان ءتۇنى تۇرعىن ۇيلەردىڭ بىرىندە ءورت شىققان بولاتىن. قىزىل جالىندى بايقاعان ايەل وتقا ورانعان ءۇيدىڭ تەرەزەسىن سىندىرىپ كامەلەتكە تولماعان بالالاردى سىرتقا شىعارعان. سول ساتتە قالا اكىمى كوپبالالى انانىڭ ەرلىگىنە العىسىن ءبىلدىرىپ, ءتورت بولمەلى پاتەردىڭ كىلتىن تابىستاۋعا ۋادە بەرگەن بولاتىن.
سالتاناتتى شارادا سوفيانىڭ اكەسى رۇستەنبەك ۇركىمباەۆ پەن مارينا گافاروۆا مەملەكەت باسشىسىنا ەرەكشە العىسىن ءبىلدىردى. سوفيا دا ءوزىنىڭ قۋانىشىن جاسىرماي, ولەڭ وقىپ, ونى ەل پرەزيدەنتىنە جولدادى.
