«التىن وردا» بازارىنداعى بىلىق: 300-گە جۋىق ساتۋشىدان قارجى العان ەكس-ديرەكتور الاياق پا?

فوتو:سپۋتنيك.كز

الماتىنىڭ كىرە بەرىسىندەگى اتىشۋلى «التىن وردا» بازارىنىڭ ساتۋشىلارى تاعى دا شۋ شىعاردى, دەپ حابارلايدى Ulysmedia.kz.

ساتۋشىلار بۇرىنعى بازار باسشىسى جاڭا ورىن سالىپ بەرەمىن دەگەن جەلەۋمەن 300-گە جۋىق ادامنان قوماقتى قارجى جيناپ الىپ, حابارسىز كەتكەن دەيدى.

وڭىردەگى ەڭ ءىرى 10 مىڭعا جۋىق ورنى بار «التىن وردا» بازارىنىڭ ەكس-ديرەكتورى قوسىمشا تاعى ساۋدا ورىندارىن سالامىز دەپ ساتۋشىلاردان قارجى جيناپ العان. بىراق ورىن دا جوق, اقشا دا جوق, ال باسشىلىققا سەنگەن 300-گە جۋىق ساتۋشى بەرگەن قارجىسىن كىمنەن تالاپ ەتەرىن بىلمەي, سان سوعىپ وتىر.

«10 اي بويى ارقايسىمىز جالپى سوماسى 8-10 ميلليوننان تەڭگە اقشا قۇيدىق. 1 ميلليارد 600 ميلليون تەڭگەنى جيناپ العان دانيار الپيەۆ جوق بولىپ كەتتى. ال ءبىز ورنىمىزدى كۇتىپ ءجۇرمىز», — دەيدى ساتۋشى رايحان ايدارباەۆا.

بازار باسشىلىعىنىڭ زاڭگەرىنىڭ ايتۋىنشا, قولدارىندا بارلىق كەلىسىمدەر بار. وزدەرى دە ءىستىڭ زاڭ جۇزىندە شەشىلگەنىن قالاپ وتىرعانىن جەتكىزدى.

«قازىر جينالىپ جاتقان سالىمشىلاردىڭ ءبارىنىڭ قولدارىندا چەكتەرىمەن راستالعان ءتيىستى قۇجاتتارى بار. ولار «التىن وردا نيۋ» كومپانياسىنا, ياعني بۇنىڭ الدىندا جۇمىس اتقارعان كومپانياعا اقشا قۇيعان», — دەيدى بازار باسشىلىعىنىڭ زاڭگەرى ءىزباسار وتەۋلين.

ال پوليتسيا بۇعان قاتىستى ءىس قوزعادى.

«الاياقتىق فاكتىسى بويىنشا پوليتسيا قىلمىستىق ءىس قوزعادى. ءىس بويىنشا بارلىق ءمان-جايلاردى انىقتاۋ ءۇشىن جەدەل-تەرگەۋ ءىس-شارالارىنىڭ بارلىق كەشەنى وتكىزىلۋدە. قازىرگى ۋاقىتتا قىلمىستىق پروتسەس قاتىسۋشىلارى قىلمىستىق ىسپەن تانىسۋدا. تەرگەۋ امالدارى اياقتالعان سوڭ, قىلمىستىق ءىس سوتقا جولدانادى», — دەدى الماتى وبلىسى پوليتسيا دەپارتامەنتىنىڭ رەسمي وكىلى مەرۋەرت مورياكوۆا.

پوليتسيا دەپارتامەنتى وكىلى ەگەر بۇرىنعى بازار باسشىسىنىڭ كىناسى دالەلدەنسە, زاڭ الدىندا جاۋاپ بەرەتىنىن ايتتى.