Amangeldi Keńshilik: Ákemniń ádebıette baǵyndyrǵan bıigi durys tanylmaı jatyr

Foto: ashyq derekkóz

Ádebıet synshysy, Halyqaralyq «Alash» syılyǵynyń laýreaty Amangeldi Keńshilik «Ujdan» Ákeler alańyna bergen suhbatynda aqyn ákesiniń ómir joly men qazaq ádebıetine sińirgen eńbegi týraly keńinen aıtyp berdi, – dep jazady qandastar.kz

«Qazaqtyń asa kórnekti aqyny, meniń ákem Keńshilik Myrzabekov 1946 jyly Torǵaı aýdany, Shyǵanaq aýylynda dúnıege kelgen. Ákemniń «Bizdiń aýyl temir joldan shetkeri» dep keletin bir óleńi bar. Shynynda, bizdiń aýylymyz qıyr shette ornalasqan, qaımaǵy buzylmaǵan qazaqy ólke edi. Ákem sol aýyldaǵy mektepte bilim aldy. Jastaıynan úlken qarııalardyń qazynaly áńgimesin tyńdap ósti. Meniń bir ókinetim, ákemniń qazaq ádebıetindegi qaıtalanbas úlken bıigi áli kúnge deıin óz deńgeıinde tanylmaı jatyr. Olaı deıtin sebebim, ákem ádebıetke úlken qubylys bolyp kelgen aqyn. Máselen, onyń 16-17 jasynda jazǵan óleńderin oqysaq dál sondaı deńgeıde qazaq ádebıetinde qalam terbetken aqyn joqtyn qasy. Ákemniń taǵy bir ereksheligi, ballada janrynda ǵajap eńbek etti. Qazaqtyń úlken aqyny Qaınekeı Jarmaǵambetov ballada janrynyń negizin qalasa, osy janrdy shyńǵa jetkizgen meniń ákem dep tolyq aıtýymyzǵa bolady», – dedi Amangeldi Keńshilik.

Suhbat barysynda Amangeldi Keńshilik ákesiniń bala tárbıesindegi ustanymdary men jeke qasıetterin aıtyp, úlgili bolmasyn baıandap berdi.

«Meniń ákem eshqashan maǵan qatty zekip, ursyp kórgen emes. Bárin aqylmen, baıyppen túsindirýge tyrysatyn. Sondaı-aq, ákem bala tárbıesine barynsha kóńil bóldi. Balalarynyń ádebıetke, tarıhqa jaqyn etip ósirdi. Meniń ózim de kishkentaı kezimde shyǵarmashylyqqa jaqyn bolyp óstim. Bastaýysh synyp oqyp júrgende qyzyqty áńgimelerim sol kezdegi balalar gazeti “Qazaqstan pıonerinde” jaryq kórip jatty. Ákem sol áńgimelerimdi oqyp, jazý stılin saqtaýdy úıretip, óziniń aqylyn aıtyp otyratyn», – dedi Amangeldi Keńshilik.