امانجول ءالتاي: ءبىر فۋتبول كلۋبىنا جىلىنا 1,5 ملرد تەڭگە, ال ۇلتتىق سپورتقا نەبارى 150 ملن بولىنەدى

فوتو: اشىق دەرەككوز

«ءبىر عانا فۋتبول كلۋبىنا جىلىنا 1,5-2 ملرد تەڭگە بولىنسە, ۇلتتىق سپورتقا نەبارى 150 ملن تەڭگە بولىنەدى. كوشپەندىلەر ويىندارىنان كەيىن قر تۋريزم جانە سپورت مينيسترلىگى ۇلتتىق سپورتتىڭ بىزگە كەرەك ەكەنىن جانە ونىڭ جاستارىمىزدىڭ رۋحتى, نامىستى تۇلعا بولىپ قالىپتاسۋىنا وڭ ىقپال ەتەتىنىن تەرەڭ تۇسىنەدى دەپ سەنەمىن». بۇل پىكىردى ءماجىلىس دەپۋتاتى, ايتىسكەر اقىن امانجول ءالتاي ALASH.KZ ۇلتتىق پورتالىنا بەرگەن سۇحباتىندا ايتتى, – دەپ جازادى qandastar.kz

ۇلتتىق بولمىسىمىزدى ايشىقتايتىن ۇلتتىق سپورت قايتا جاڭعىردى

– مۇنداي اۋقىمدى ءىس-شارالار ءوزىمىزدى تانۋ ءۇشىن, قازاقتىڭ ۇلتتىق بولمىسىن الەمگە تانىتۋ ءۇشىن ماڭىزدى. V دۇنيەجۇزىلىك كوشپەندىلەر ويىندارىنا 89 مەملەكەتتەن وكىلدەر كەلىپ, قانشاما تۋريستەر وسى ءدۇبىرلى دودانى تاماشالادى. بىرىنشىدەن, بۇل باستاما عاسىرلار بويى اتا-بابامىزدان قانىمىزعا, سۇيەگىمىزگە سىڭگەن ۇلتتىق بولمىسىمىزدى ايشىقتايتىن ۇلتتىق سپورتتىڭ قايتا جاڭعىرۋىنا جول اشتى.

سپورت مينيسترلىگى ۇلتتىق سپورت بىزگە كەرەك ەكەنىن تۇسىنەدى دەپ سەنەمىن

– وكىنىشكە قاراي, بۇگىنگى كۇنگە دەيىن سپورت سالاسىندا ۇلتتىق سپورتتىڭ كەنجە قالىپ وتىرعانى اقيقات. قارجىلاندىرۋ كەزىندە دە ۇلتتىق سپورتقا جەتكىلىكتى قولداۋ كورسەتىلمەي كەلەدى. كوشپەندىلەر ويىندارىنان كەيىن تۋريزم جانە سپورت مينيسترلىگى ۇلتتىق سپورتتىڭ بىزگە كەرەك ەكەنىن جانە ونىڭ جاستارىمىزدىڭ رۋحتى, نامىستى تۇلعا بولىپ قالىپتاسۋىنا وڭ ىقپال ەتەتىنىن تەرەڭ تۇسىنەدى دەپ سەنەمىن. بايقاساڭىزدار, ءبىر اپتا بويى بىرنەشە ۇلتتىق سپورت تۇرىنەن كەرەمەت جارىستاردىڭ ءدۇبىرى قىزدى. بايگە, كوكپار, قازاق كۇرەسى, جامبى اتۋ, ات ۇستىندەگى اۋدارىسپاق – مۇنىڭ ءبارى ناعىز جۇزدەن جۇيرىك, مىڭنان تۇلپارلاردىڭ جۇلدىزى جارقىرايتىن الامان عوي.

اتقا مىنگەن قازاق بالاسىنىڭ ەلىنە, جەرىنە دەگەن قۇرمەتى ارتادى 

– ءبىزدىڭ سان عاسىرلار بويى اتا-بابالارىمىز شۇعىلدانعان ۇلتتىق سپورت قازىرگى تەلەفونعا تەلمىرگەن قوعامدا ءوسىپ كەلە جاتقان بالالارىمىز ءۇشىن وتە قاجەت. اتقا مىنگەن قازاق بالاسىنىڭ ىشكى بولمىسى, رۋحاني ساناسى قالىپتاسىپ, تاريحىنا, ەلىنە, جەرىنە دەگەن قۇرمەتى ارتادى. ءبىز وسىناۋ ۇلانعايىر دالانى تەگىننەن-تەگىن جۋاس بولعانىمىزدان ەمەس, نامىسشىل, مىقتى ۇلت بولعانىمىزدان ساقتاپ قالدىق. وسى قاسيەتتەرىمىزدى بولاشاق ۇرپاققا جەتكىزۋ ءۇشىن حالىقارالىق دەڭگەيدەگى وسىنداي جوبالاردىڭ ماڭىزى زور. بۇل ءىس-شارانىڭ ەلىمىزگە وڭ ناتيجە بەرەتىنىنە سەنەمىن.

وليمپيادا چەمپيوندارىن قالاي تانىساق, ۇلتتىق سپورت ساڭلاقتارىن دا سولاي تانىتۋىمىز قاجەت

– اقپارات سالاسىنىڭ كەمشىل تۇستارىنىڭ ءبىرى – ۇلتتىق سپورت جۇلدىزدارىن ناسيحاتتاۋدىڭ جەتكىلىكسىزدىگى. ءبىز تەلەارنالار, ءباسپاسوز, الەۋمەتتىك جەلىلەر ارقىلى ۇلتتىق سپورتتىڭ قازىرگى وكىلدەرىن كەڭىنەن تانىتا بەرۋىمىز قاجەت. ۇلتتىق سپورتقا ارنالعان ارنايى باعدارلامالار دايىندالىپ, ۇنەمى حالىققا كورسەتىلىپ وتىرسا, ولاردى كوپشىلىك تاني باستايدى. بۇل مادەنيەت جانە اقپارات مينيسترلىگىنىڭ ماڭىزدى مىندەتتەرىنىڭ ءبىرى. بولاشاقتا بۇل ماسەلەگە ەرەكشە كوڭىل ءبولىنۋى كەرەك.  وليمپيادا چەمپيوندارىن قالاي تانىساق, ۇلتتىق سپورت ساڭلاقتارىن دا سونداي دەڭگەيدە تانىتۋعا ءتيىسپىز. وسى باعىتتا جۇمىس جۇرگىزىلسە, تەك جەكەلەگەن سپورتشىلاردىڭ تانىمالدىعى ارتىپ قانا قويماي, جالپى ۇلتتىق سپورتتىڭ دامۋىنا دا وڭ ىقپالى تيەدى. سونداي-اق حالىقارالىق دەڭگەيدەگى ويىندارعا قاتىساتىن ۇلتتىق سپورت جۇلدىزدارىن ىرىكتەۋ كەزەڭدەرى اشىق ءارى ءادىل ءوتۋى قاجەت. بارماق باستى, كوز قىستى ەمەس, شىن مىقتىلاردىڭ شىققانى ءجون. بۇل – ەل نامىسى. الداعى ۋاقىتتا وسى ماسەلەلەر كەشەندى تۇردە شەشىمىن تابادى دەپ سەنەمىز. 

ءبىر عانا فۋتبول كلۋبىنا جىلىنا 1,5-2 ملرد تەڭگە بولىنسە, ۇلتتىق سپورتقا نەبارى 150 ملن تەڭگە بولىنەدى

– قازىرگى تاڭدا ۇلتتىق سپورتقا نەبارى 150 ميلليون تەڭگە شاماسىندا قارجى بولىنەدى. بۇل وتە از. مىسالى, ءبىر عانا «ورداسى» فۋتبول كلۋبىنا جىلىنا 1,5-2 ميلليارد تەڭگە بولىنەدى, بۇدان بولەك دەمەۋشىلەر دە قولداۋ كورسەتەدى. ءبىر فۋتبول كلۋبىنا بولىنەتىن جىلدىق قاراجات ۇلتتىق سپورتقا بولىنەتىن قارجىدان 10-20 ەسە كوپ. بۇل ادىلەتسىزدىك. ءبىز مۇنى تۇزەتۋىمىز ءتيىس. الداعى ۋاقىتتا ۇلتتىق سپورتقا قاتىستى ارنايى زاڭ قابىلداۋىمىز قاجەت. ارىپتەسىم قازبەك الىشەۆپەن بىرگە ۇلتتىق سپورت تۋرالى زاڭ جوباسىن دايىنداۋعا نيەتتىمىز. ەگەر قولداۋ بولسا, تۋريزم جانە سپورت مينيسترلىگىمەن بىرلەسە وتىرىپ, بۇل زاڭدى قابىلداپ, ۇلتتىق سپورتتىڭ دامۋىن زاڭنامالىق تۇرعىدان قولداۋعا جانە قورعاۋعا مۇمكىندىك الار ەدىك.

تۋريستەردى ءبىزدىڭ ۇلتتىق بولمىسىمىز قىزىقتىرادى, وسى باعىتتا ارنايى مەملەكەتتىك باعدارلاما قاجەت 

– حالىقارالىق دەڭگەيدە قاراساق, تۋريستەردى ەڭ الدىمەن ءبىزدىڭ ۇلتتىق بولمىسىمىز بەن ەرەكشەلىگىمىز قىزىقتىرادى. ءبىز ءوزىمىزدىڭ رۋحاني مۇرامىزدى كوبىرەك كورسەتە ءبىلۋىمىز قاجەت. ەلىمىزدە العاش رەت وتكىزىلگەن تاريحي ءىس-شارا – وسىنىڭ ايقىن كورىنىسى. دەگەنمەن ءبىز قازىرگى كەزدە ەتنوتۋريزمدى دامىتۋ ءۇشىن كەشەندى تۇردە جاسالىنعان ناقتى الگوريتم كورىپ وتىرعان جوقپىز. بۇل باعىتتا ۇزاقمەرزىمدى مەملەكەتتىك باعدارلاما قاجەت. تۋريزم جانە سپورت مينيسترلىگى وسى ماسەلەنى قولعا العانى ءجون. بىزدە مەنەدجمەنت جاعى ءالسىز, وزگەلەر ءبىزدى تانىمايدى. قازاقستانعا كەلگىسى كەلەتىن شەتەلدىكتەر عالامتوردان ءبىز جايلى ماعلۇمات ىزدەگەندە, كوڭىل تولاتىنداي قازاقتىلدى اقپارات تاپپاي جاتادى. ءبىز وسىعان ءمان بەرىپ, وزگەلەردى قىزىقتىرا ءبىلۋىمىز قاجەت. تۋريزم ارقىلى مەملەكەتتىك كىرىستى نەگىزگى كوزگە اينالدىرعان مەملەكەتتەر از ەمەس, ولار جوقتان بار جاساپ وتىر. ال ءبىز بارىمىزدى لايىقتى دارەجەدە كورسەتە الماي وتىرمىز. ماسەلەن, ۇلت ۇياسى ۇلىتاۋدا جوشى حان كەسەنەسى بار. الەم جوشى حاننىڭ ءبىزدىڭ جەرىمىزدە جاتقانىن بىلمەيدى. ەگەر بىلگەندە, بۇل ەلىمىزگە تۋريستەردىڭ كوپتەپ كەلۋىنە ىقپال ەتەر ەدى. بىزدە الەمدى قىزىقتىراتىن كوپتەگەن قاسيەتتى ورىندار بار, بىراق ءبىز ءوزىمىز ساكرالدى جەرلەرىمىزدى ءالى دۇرىس باعالاماي كەلەمىز.