ءبىلىم
AMANZHOLOV UNIVERSITY بازاسىندا ينكليۋزيۆتى باستاۋىش مەكتەبى اشىلدى
فوتو: قر عىلىم جانە جوعارى ءبىلىم مينيسترلىگى
س.امانجولوۆ اتىنداعى شىعىس قازاقستان ۋنيۆەرسيتەتىندە ينكليۋزيۆتى باستاۋىش مەكتەپ اشىلدى, دەپ حابارلايدى qandastar.kz.
وسى وقۋ جىلىنان باستاپ 5-6 جاستاعى سويلەۋ دامۋى تەجەلگەن بالالارعا ۋنيۆەرسيتەت ماماندارى دارىگەرلىك ۇسىنىستار مەن جەكە ەرەكشەلىكتەردى ەسكەرە وتىرىپ, ساپالى ءبىلىم بەرۋ پروتسەسىن باستايدى.
بۇل يننوۆاتسيالىق جوبا قر عىلىم جانە جوعارى ءبىلىم ءمينيسترى ساياسات نۇربەكتىڭ ۋنيۆەرسيتەتكە ساپارى بارىسىندا تانىستىرىلدى.
– مينيسترلىكتىڭ ستراتەگياسىندا ينكليۋزيۆتى ءبىلىم بەرۋ ەڭ باسىم باعىتقا يە. ينكليۋزيۆتى ءبىلىم بەرەتىن پەداگوگتەردى دايىنداۋدا ىرىكتەلگەن ۇزدىك جوعارى وقۋ ورىندارىنىڭ ىشىندە وسى س.امانجولوۆ اتىنداعى شقۋ بار. ۋنيۆەرسيتەت ينكليۋزيۆتى ءبىلىم بەرۋگە ارنالعان ارنايى كابينەتتەر مەن ادىستەمەلىك ماتەريالدارمەن تولىق قامتاماسىز ەتىلگەن. زاماناۋي تالاپتارعا سايكەس ساپالى ءبىلىم بەرۋ شقۋ-دى ەل كولەمىندە كوشباسشى ەتەدى, – دەدى ساياسات نۇربەك.
