جاڭالىقتار
«امەريكا داۋىسى» جۋرناليستەرى ترامپ اكىمشىلىگىن سوتقا بەردى
فوتو: pixabay
امەريكا داۋىسى راديوستانتسياسىنىڭ ءبىر توپ قىزمەتكەرلەرى اقش پرەزيدەنتى دونالد ترامپتىڭ اكىمشىلىگىنە قارسى فەدەرالدى بيۋدجەتتەن قارجىلاندىرىلعان مەدياحولدينگتىڭ زاڭسىز جابىلۋىنا بايلانىستى سوتقا شاعىم ءتۇسىردى, دەپ حابارلايدى qandastar.kz
The Washington Post گازەتى نيۋ-يورك سوتىنا سىلتەمە جاساي وتىرىپ, شاعىم تۇسىرگەن التى جۋرناليست ەكەنىن جازدى.
«ولار ترامپ اكىمشىلىگىنىڭ مۇشەلەرىن 2025 جىلدىڭ 21 ناۋرىزى, جۇما كۇنى سوتقا بەرىپ, شەنەۋنىكتەردى فەدەرالدى بيۋدجەتتەن قارجىلاندىرىلاتىن بۇقارالىق اقپارات قۇرالدارىن زاڭسىز جاۋىپ تاستادى دەپ ايىپتادى», – دەپ جازدى باسىلىم.
تالاپكەرلەردىڭ پىكىرىنشە, راديوستانتسيانى جابۋ زاڭسىز. ولار سونداي-اق مالىمدەمەسىندە باق جۇمىسىن قالپىنا كەلتىرۋدى تالاپ ەتتى.
ەسكە سالساق,2025 جىلدىڭ 16 ناۋرىزىندا اقش پرەزيدەنتى بيۋروكراتيامەن كۇرەسۋ ماقساتىندا بىرنەشە ۇيىمداردىڭ جۇمىسىن قىسقارتۋ تۋرالى جارلىققا قول قويعان بولاتىن. ولاردىڭ ىشىندە «ازاتتىق راديوسى/ازات ەۋروپا راديوسى» مەن «امەريكا داۋىسى» مەدياحولدينگتەرىن باقىلايتىن اقش-تىڭ عالامدىق مەديا اگەنتتىگى (USAGM) دە بار. كەيىن ترامپ اكىمشىلىگى «ازاتتىق راديوسى» جەلىسىنىڭ بارلىق قارجىلاندىرۋىن توقتاتقانى بەلگىلى بولدى.
