«Amerıka daýysy» jýrnalısteri Tramp ákimshiligin sotqa berdi

Foto: pixabay

Amerıka daýysy radıostanııasynyń bir top qyzmetkerleri AQSh prezıdenti Donald Tramptyń ákimshiligine qarsy federaldy bıýdjetten qarjylandyrylǵan medıaholdıngtiń zańsyz jabylýyna baılanysty sotqa shaǵym túsirdi, dep habarlaıdy qandastar.kz

The Washington Post gazeti Nıý-Iork sotyna silteme jasaı otyryp, shaǵym túsirgen alty jýrnalıst ekenin jazdy.

«Olar Tramp ákimshiliginiń múshelerin 2025 jyldyń 21 naýryzy, juma kúni sotqa berip, sheneýnikterdi federaldy bıýdjetten qarjylandyrylatyn buqaralyq aqparat quraldaryn zańsyz jaýyp tastady dep aıyptady», – dep jazdy basylym.

Talapkerlerdiń pikirinshe, radıostanııany jabý zańsyz. Olar sondaı-aq málimdemesinde BAQ jumysyn qalpyna keltirýdi talap etti.

Eske salsaq,2025 jyldyń 16 naýryzynda AQSh prezıdenti bıýrokratııamen kúresý maqsatynda birneshe uıymdardyń jumysyn qysqartý týraly jarlyqqa qol qoıǵan bolatyn. Olardyń ishinde «Azattyq radıosy/Azat Eýropa radıosy» men «Amerıka daýysy» medıaholdıngterin baqylaıtyn AQSh-tyń ǵalamdyq medıa agenttigi (USAGM) de bar. Keıin Tramp ákimshiligi «Azattyq radıosy» jelisiniń barlyq qarjylandyrýyn toqtatqany belgili boldy.