امەريكالىق كومپانيا الماتى وبلىسىنداعى جاڭا زاۋىتقا $160 ملن جەكە ينۆەستيتسيا سالادى

پرەمەر-مينيستر ولجاس بەكتەنوۆ رەسەي, بەلارۋس, كاۆكاز, ورتالىق ازيا ەلدەرىندەگى Pepsiسo ازىق-ت ۇلىك ونەركاسىبى سالاسىنداعى ءىرى ترانسۇلتتىق كورپوراتسياسىنىڭ پرەزيدەنتى داۆيد مانزينيمەن كەزدەسۋ وتكىزدى,-دەپ حابارلايدى Qandastar.kz

نەگىزگى ماسەلە – مەملەكەت باسشىسى قاسىم-جومارت توقاەۆ پەن PepsiCo پرەزيدەنتى رامون لاگۋارتا اراسىندا قول جەتكىزىلگەن ۋاعدالاستىقتاردى ىسكە اسىرۋ. الماتى وبلىسىندا «Lays» قىتىرلاق كارتوپتارى سەكىلدى تۇزدى جەڭىل تاعامدار وندىرەتىن زاۋىت سالۋ جوباسى تالقىلاندى. بۇگىنگى تاڭدا سنەكتەر شىعاراتىن تولىققاندى جاڭا زاۋىتقا $160 ملن كولەمىندەگى شەتەلدىك جەكە ينۆەستيتسيالار ءبولىندى.

ءوندىرىستى لوكاليزاتسيالاۋ جانە يننوۆاتسيالىق تەحنولوگيالار ترانسفەرى قازاقستاندىق اۋىل شارۋاشىلىعى ونىمدەرىن تەرەڭ وڭدەۋدىڭ جاڭا دەڭگەيىنە وتۋگە مۇمكىندىك بەرەتىنىن اتاپ وتكەن ءجون.

بۇل – ىسكە قوسىلعاننان كەيىن ورتالىق ازياداعى ەڭ ءىرى جوبا بولماق. زاۋىتتى 2026 جىلى ىسكە قوسۋ كوزدەلگەن, ونىڭ قۋاتتىلىعى جىلىنا 16 مىڭ تونناعا دەيىن دايىن ءونىمدى قۇرايدى, كەيىننەن 2027 جىلدان باستاپ 21 مىڭ تونناعا دەيىن ۇلعايتىلادى. دايىن ءونىم ورتالىق ازيا نارىعىنا جانە ودان تىسقارى جەرلەرگە جەتكىزىلەتىن بولادى. قۇرىلىس كەزەڭىندە مىڭعا جۋىق ادام تارتىلادى, ال جوبانىڭ وزىندە 350-گە جۋىق بىلىكتى ماماندارعا ارنالعان جۇمىس ورنىن اشۋ جوسپارلانىپ وتىر.

داۆيد مانزيني جوبانى جۇزەگە اسىرۋ بارىسىندا كومپانيا نەگىزىنەن جەرگىلىكتى شيكىزاتتى ساتىپ الۋعا نيەتتى ەكەنىن ايتتى. قازاقستاندىق فەرمەرلەرمەن كارتوپتىڭ سىناقتىق پارتيالارىن جەتكىزۋگە كەلىسىمشارتتار جاساسۋ بويىنشا جۇمىس جۇرگىزىلىپ جاتىر. 2026-2030 جىلدارى 50-66 مىڭ تونناعا جۋىق كارتوپ ساتىپ الۋ, كەيىنىرەك كولەمدى ودان ءارى ۇلعايتۋ جوسپاردا بار. پروتسەستەردىڭ تەحنولوگيالىعىن ەسكەرە وتىرىپ, جوعارى قايتا وڭدەۋ دەڭگەيى قامتاماسىز ەتىلەدى, ال جاڭا وزىق ادىستەر ەكولوگيالىق تۇراقتىلىق قاعيداتتارىنا سايكەس كەلۋگە مۇمكىندىك بەرەدى. وسىلايشا, جاڭا زاۋىتتىڭ قالدىقتارى 100% قايتا وڭدەلىپ, كادەگە جاراتىلاتىن بولادى.

كومپانيا جوبانى قىسقا مەرزىمدە ىسكە اسىرۋعا مۇددەلى. قازاقستاندا قۇرىلعان قولايلى ينۆەستيتسيالىق احۋال قازىردىڭ وزىندە جوبانى دامىتۋدىڭ كەلەسى كەزەڭدەرىن پىسىقتاۋعا مۇمكىندىك بەرەدى. كەيىن PepsiCo ونىمدەردىڭ باسقا دا كوپتەگەن ءتۇرىن شىعارۋ ءۇشىن زاۋىتتى جاڭعىرتۋعا تاعى دا ينۆەستيتسيا سالادى.

ۇكىمەت باسشىسى ولجاس بەكتەنوۆ بۇل جوبانىڭ اۋىل شارۋاشىلىعىن دامىتۋ, قازاقستاندىق شارۋالاردىڭ تابىسىن ارتتىرۋ جانە جالپى العاندا ەكونوميكانى نىعايتۋ ءۇشىن ماڭىزدىلىعىن اتاپ ءوتتى, سەبەبى وسىنداي اۋقىمدى ينۆەستيتسيالىق باستامالار پرەزيدەنتتىڭ ەكونوميكانى ءارتاراپتاندىرۋ بويىنشا العا قويعان ماقساتتارىنا سايكەس كەلەدى. جوبانىڭ ازىق-ت ۇلىك ونەركاسىبى مەن اوك ءۇشىن ماڭىزدىلىعىمەن قاتار, زاۋىت قۇرىلىسى ىرگەلەس كولىك, لوگيستيكا, اۋىل شارۋاشىلىعى ونىمدەرىن قاپتاۋ جانە قايتا وڭدەۋ سالالارىنا مۋلتيپليكاتيۆتى اسەر ەتەدى.

«اقش – قازاقستاننىڭ ماڭىزدى ينۆەستيتسيالىق سەرىكتەستەرىنىڭ ءبىرى. قازاقستان PepsiCo سەكىلدى ستراتەگيالىق ينۆەستورلارمەن ۇزاقمەرزىمدى ىنتىماقتاستىققا مۇددەلى. ءبىز ينۆەستيتسيالاردى قورعاۋ بويىنشا مىندەتتەمەلەردى ساقتايمىز جانە قاجەتتى قولداۋ كورسەتۋگە دايىنبىز», — دەپ اتاپ ءوتتى ولجاس بەكتەنوۆ.

زاۋىت ۇكىمەتتىڭ ەرەكشە باقىلاۋىنداعى باسىم ينۆەستيتسيالىق جوبالار پۋلىنا ەنگىزىلگەن. جالپى, وسى جىلدىڭ ءبىرىنشى توقسانىنىڭ قورىتىندىسى بويىنشا پۋل 122,5 مىڭ جۇمىس ورنىن اشاتىن, 32 ترلن تەڭگەنى قۇرايتىن 704 جوبادان تۇرادى.

كەزدەسۋ قورىتىندىسى بويىنشا تاراپتار قازاقستاننىڭ ازىق-ت ۇلىك الەۋەتىن ارتتىرۋعا ىقپال ەتەتىن جاڭا جوبالاردى جۇزەگە اسىرۋ بويىنشا ءوزارا ءىس-قيمىلدى كەڭەيتۋ جانە ۇزاقمەرزىمدى ىنتىماقتاستىقتى قۇرۋ نيەتىن راستادى.