امەريكالىق وتباسى اسىراپ العان قازاق قىزدارى استاناعا كەلدى

استاناعا امەريكالىق وتباسى اسىراپ العان ءۇش قازاق قىزى مەن ولاردى وسىرگەن اناسى كەلدى. امەريكالىق شەرون كوللينس بەس قازاق قىزىن باۋىرىنا باسىپ, ولاردان 15 نەمەرە ءسۇيىپ وتىر, دەپ حابارلايدى qandastar.kz سايتى حابار ارناسىنا سىلتەمە جاساپ.

تەلەارنا ءتىلشىسىنىڭ حابارلاۋىنشا, اقش وتباسى اسىراپ العان سۇيكىمدى ەسىمدى ارۋ 20 جىل وتكەن سوڭ اپكەسىمەن كەزدەستى. ۇزاق جىلدار بويى كۇتكەن ساعىنىش پەن شەكسىز مەيىرىمدى تۇسىندىرۋگە ءتىل كەدەرگى بولماعان. سەبەبى سۇيكىمدى 4 جاسىندا بالالار ۇيىنە جىبەرىلىپ, 5 جىلدان سوڭ امەريكالىق وتباسى اسىراپ العان.

«مەن قاتتى تولقىپ تۇرمىن. اپكەمدى كورگەنىمە وتە قۋانىشتىمىن. مۇنداي مۇمكىندىك بەرگەنىنە ريزامىن. قازاقستاننىڭ مەنىڭ ەلىم ەكەنىن ءبىلىپ ءوستىم. سان-ديەگو, كاليفورنياداعى دۇكەندەردە باۋىرساقتار مەن ەسىمدە قالعان قازاق تاعامدارىن كورگەندە, مەن سول تۋرالى تولىق اقپاراتتى ينتەرنەتتەن ىزدەيتىن ەدىم. مەنىڭ ەلىمە, باۋىرىما دەگەن ماحابباتىمدى سوزبەن ايتىپ جەتكىزۋ قيىن», — دەيدى سۇيكىمدى كوللينس.

تەلەارنا مالىمەتىنە سۇيەنسەك, قازاق قىزى گيمناستيكادان 6 رەت الەم چەمپيوناتىنا قاتىسىپ, اقش تۋىن بيىككە كوتەرگەن. 2005 جىلى زارينا, ينديرا, ەلۆيرا, سۇيكىمدى جانە نايليانى باۋىرىنا باسقان شەرون قازىر 17 نەمەرە ءسۇيىپ وتىر. ونىڭ 15-ءى قازاق قىزدارىنىڭ ومىرگە اكەلگەن ۇرپاعى. وسى ساپارىندا شەرون ءۇش قىزىن تۋعان ەلىنە الىپ كەلدى.

«باستاپقىدا تەلەارنالاردان 3 قازاق قىزىن اسىراپ الاتىن وتباسى ىزدەپ جاتقانىن ايتقان. سەبەبى ءبىرىنشى ءوتىنىش بەرگەن وتباسى ءبىر سەبەپپەن باس تارتىپتى. مەن بالانىڭ ءسوزىن تەلەارنادان ەستىگەندە جۇرەگىم ءجىبىپ, جولداسىممەن ۇلكەن شەشىم قابىلدادىق. قۇجاتتارىندا قيىندىقتار بولعان سوڭ, قازاقستانعا كەلگەندە ءارتۇرلى وتباسىنىڭ ەكى قىزى مەيىرىممەن ءبىزدى قۇشاقتاپ قارسى الدى. سول ساتتە ءبىز 5 بالاعا اتا-انا بولا الامىز دەپ شەشىم قابىلدادىق. وكىنگەن ەمەسپىز. وسى بالالارىمدى كولىك جۇرگىزىپ, ادال ەڭبەكپەن اسىراپ, مەيىرىم توگىپ وسىردىك. 40-تان اسقاندا اجە اتاندىم», — دەيدى شەرون كوللينس.

4 جىل بۇرىن كاليفورنياداعى 25 قازاق بالاسىن اقش-قا وقۋعا بارعان جۋرناليست گۇلميرا دايراباي ىزدەپ تاپتى. ول بالالاردىڭ تۇرمىسىن ءبىلىپ, تۋعان ەلى مەن جەرى تۋرالى اقپاراتتى ءبولىسىپ, ءدۇيىم جۇرتقا تانىستىردى.

«ول جەردە قانداي ماقسات بولدى? ول بالالاردىڭ ءومىرى قالاي بولدى ەكەن? ارادا 20 جىل ءوتتى. جاقسى ما ەكەن? مەن ويلايمىن بۇل ەندى ۇلكەن جەڭىس. كەتىپ قالعان بالالاردىڭ ەلىنە كەلىپ, 20 جىلدان كەيىن جەتىمدەر ۇيىنە بارۋىنا نەمەسە تۋىسقاندارىمەن كەزدەسۋىنىڭ ءوزى, ياعني مىناۋ تۇپتەگى تامىردىڭ بەلگىسى دەپ ويلايمىن. سوعان كىشكەنتايدا سەپتىگىم تيگەنىنە قۋانىشتىمىن», — دەيدى گۇلميرا دايراباي.

جۋرناليست الداعى ۋاقىتتا شەتەل اسىپ كەتكەن ءبىراز بالالاردىڭ ەلگە ورالۋىنا كومەكتەسۋگە دايىن. بۇل باستاما تەك يگى ىستەردىڭ العاشقى قادامى بولماق. ودان بولەك بۇعان دەيىن سەنات دەپۋتاتى دارحان قىدىرالى شەتەلدىكتەر اسىراپ العان قازاقستاندىق بالالار تۋرالى كەشەندى زەرتتەۋ جۇرگىزۋدى ۇسىنعان بولاتىن.

«1999-2011 جىلدار اراسىندا شەتەلدىكتەر 8805 بالانى اسىراپ العان. كامەلەتكە تولماعان 3588 بالا تۋرالى ەسەپ الىنىپ تۇرادى. وكىنىشكە قاراي ەسەپ بەرمەيتىندەر دە از ەمەس. ەڭ سوراقىسى 1999 جىلعا دەيىن قانشا بالانىڭ شەتەلگە كەتكەنى جايلى مۇلدەم مالىمەت جوق», — دەگەن ەدى سەنات دەپۋتاتى.

رەسمي مالىمەتتەرگە سايكەس, وڭتۇستىك افريكا ەلىنە كەتكەن 30 بالادان حابار جوق. سونىمەن قاتار اقش-تاعى 104 جانە بەلگياداعى 113 بالانىڭ تاعدىرى بەلگىسىز.