Amerıkalyq otbasy asyrap alǵan qazaq qyzdary Astanaǵa keldi

Astanaǵa amerıkalyq otbasy asyrap alǵan úsh qazaq qyzy men olardy ósirgen anasy keldi. Amerıkalyq Sheron Kollıns bes qazaq qyzyn baýyryna basyp, olardan 15 nemere súıip otyr, dep habarlaıdy qandastar.kz saıty Habar arnasyna silteme jasap.

Telearna tilshisiniń habarlaýynsha, AQSh otbasy asyrap alǵan Súıkimdi esimdi arý 20 jyl ótken soń ápkesimen kezdesti. Uzaq jyldar boıy kútken saǵynysh pen sheksiz meıirimdi túsindirýge til kedergi bolmaǵan. Sebebi Súıkimdi 4 jasynda balalar úıine jiberilip, 5 jyldan soń amerıkalyq otbasy asyrap alǵan.

«Men qatty tolqyp turmyn. Ápkemdi kórgenime óte qýanyshtymyn. Mundaı múmkindik bergenine rızamyn. Qazaqstannyń meniń elim ekenin bilip óstim. San-Dıego, Kalıfornııadaǵy dúkenderde baýyrsaqtar men esimde qalǵan qazaq taǵamdaryn kórgende, men sol týraly tolyq aqparatty ınternetten izdeıtin edim. Meniń elime, baýyryma degen mahabbatymdy sózben aıtyp jetkizý qıyn», — deıdi Súıkimdi Kollıns.

Telearna málimetine súıensek, qazaq qyzy gımnastıkadan 6 ret álem chempıonatyna qatysyp, AQSh týyn bıikke kótergen. 2005 jyly Zarına, Indıra, Elvıra, Súıkimdi jáne Naılıany baýyryna basqan Sheron qazir 17 nemere súıip otyr. Onyń 15-i qazaq qyzdarynyń ómirge ákelgen urpaǵy. Osy saparynda Sheron úsh qyzyn týǵan eline alyp keldi.

«Bastapqyda telearnalardan 3 qazaq qyzyn asyrap alatyn otbasy izdep jatqanyn aıtqan. Sebebi birinshi ótinish bergen otbasy bir sebeppen bas tartypty. Men balanyń sózin telearnadan estigende júregim jibip, joldasymmen úlken sheshim qabyldadyq. Qujattarynda qıyndyqtar bolǵan soń, Qazaqstanǵa kelgende ártúrli otbasynyń eki qyzy meıirimmen bizdi qushaqtap qarsy aldy. Sol sátte biz 5 balaǵa ata-ana bola alamyz dep sheshim qabyldadyq. О́kingen emespiz. Osy balalarymdy kólik júrgizip, adal eńbekpen asyrap, meıirim tógip ósirdik. 40-tan asqanda áje atandym», — deıdi Sheron Kollıns.

4 jyl buryn Kalıfornııadaǵy 25 qazaq balasyn AQSh-qa oqýǵa barǵan jýrnalıst Gúlmıra Daırabaı izdep tapty. Ol balalardyń turmysyn bilip, týǵan eli men jeri týraly aqparatty bólisip, dúıim jurtqa tanystyrdy.

«Ol jerde qandaı maqsat boldy? Ol balalardyń ómiri qalaı boldy eken? Arada 20 jyl ótti. Jaqsy ma eken? Men oılaımyn bul endi úlken jeńis. Ketip qalǵan balalardyń eline kelip, 20 jyldan keıin jetimder úıine barýyna nemese týysqandarymen kezdesýiniń ózi, ıaǵnı mynaý túptegi tamyrdyń belgisi dep oılaımyn. Soǵan kishkentaıda septigim tıgenine qýanyshtymyn», — deıdi Gúlmıra Daırabaı.

Jýrnalıst aldaǵy ýaqytta shetel asyp ketken biraz balalardyń elge oralýyna kómektesýge daıyn. Bul bastama tek ıgi isterdiń alǵashqy qadamy bolmaq. Odan bólek buǵan deıin senat depýtaty Darhan Qydyráli sheteldikter asyrap alǵan qazaqstandyq balalar týraly keshendi zertteý júrgizýdi usynǵan bolatyn.

«1999-2011 jyldar arasynda sheteldikter 8805 balany asyrap alǵan. Kámeletke tolmaǵan 3588 bala týraly esep alynyp turady. О́kinishke qaraı esep bermeıtinder de az emes. Eń soraqysy 1999 jylǵa deıin qansha balanyń shetelge ketkeni jaıly múldem málimet joq», — degen edi senat depýtaty.

Resmı málimetterge sáıkes, Ońtústik Afrıka eline ketken 30 baladan habar joq. Sonymen qatar AQSh-taǵy 104 jáne Belgııadaǵy 113 balanyń taǵdyry belgisiz.