«اناما قىسىم كورسەتىپ جاتىر»: اكتريسا اينۇر ءىلياسوۆادان الماتىلىق دارىگەر اقشا تالاپ ەتكەن

بەلگىلى اكتريسا, تەلەجۇرگىزۋشى اينۇر ءىلياسوۆا مەديتسينا سالاسىنا قاتىستى توسىن مالىمدەمە جاسادى, دەپ حابارلايدى Qandastar.kz Stan.kz اقپارات اگەنتتىگىنە سىلتەمە جاساپ.

«الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسىنا اشىق ۇندەۋ جاساۋعا ءماجبۇرمىن. سىزعانوۆ اتىنداعى ۇلتتىق عىلىمي حيرۋرگيا ورتالىعىندا بولعان جاعدايدى كاسىبي ەتيكانىڭ ورەسكەل بۇزىلۋى ءارى زاڭعا قايشى ارەكەت دەپ ەسەپتەيمىن. 18 تامىزدا انام اتالعان كلينيكاعا جاتقىزىلىپ, 20 تامىزدا وعان وتا جاسالدى. گوسپيتاليزاتسيا كەزىندە ول تەك شۇعىل بايلانىس ءۇشىن مەنىڭ تەلەفون ءنومىرىمدى كورسەتكەن بولاتىن. الايدا انەستەزيولوگ بۇل ءنومىردى ءوز ماقساتىندا پايدالانىپ, ماعان حابارلاسىپ اقشا تالاپ ەتتى. مەن ديرەكتوردىڭ اتىنا شاعىم تۇسىرگەننەن كەيىن, سول قىزمەتكەر قايتادان انامنىڭ قاسىنا كەلىپ, وتادان كەيىن توسەكتە جاتقان اناما قىسىم كورسەتىپ, «قىزىڭدى تىنىشتاندىر» دەپ ايتقان», – دەدى ءىلياسوۆا.

اكتريسا بۇل ارەكەتتى زاڭسىز دەپ اشۋلانىپ, ورتالىققا قىزمەتتىك تەكسەرۋ جۇرگىزۋدى تالاپ ەتتى.

«بۇل جاعداي «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستى, ناۋقاستىڭ مەديتسينا قىزمەتكەرلەرىنەن قۇرمەت پەن ىزگىلىك كورۋ قۇقىعىن جانە مەديتسينا قىزمەتكەرلەرىنىڭ ار-نامىس كودەكسىن بۇزادى», – دەپ جازدى ول.