«اناسى مەن وگەي اكەسى»: الماتى وبلىسىندا ءۇش جاسار قىزدىڭ ولىمىنە كۇدىكتىلەر انىقتالدى

17 ناۋرىزدا ءۇش جاسار ايا-سوفيا الماتى وبلىسىنىڭ كۇش اۋىلىندا جوعالىپ كەتكەن بولاتىن. قىزدى بىرنەشە اي ىزدەدى, بىراق ەش ناتيجە بولمادى. شىلدەنىڭ سوڭىندا پوليتسەيلەر جوعالعان بالاعا تيەسىلى بولۋى مۇمكىن سۇيەك قالدىقتارىن تاپتى. الماتى وبلىسىنىڭ پوليتسيا دەپارتامەنتى قىزدى ءولتىردى دەگەن كۇدىكپەن كىم ۇستالعانىن مالىمدەدى, دەپ حابارلايدى qandastar.kz اقپارات پورتالى «Tengrinews.kz«-كە سىلتەمە جاساپ.

شىلدە ايىندا ادام سۇيەكتەرى تابىلعان كەزدە پوليتسەيلەر قىلمىسقا كۇدىكتىلەردىڭ ۇستالعانىن ايتتى, بىراق ولاردىڭ كىمدەر ەكەنىن حابارلامادى. قازىر بالانىڭ اناسى مەن ونىمەن بىرگە تۇراتىن ادامنىڭ اۋىر قىلمىس جاسادى دەگەن كۇدىكپەن قاماۋعا الىنعانى بەلگىلى بولدى.

«قازىرگى ۋاقىتتا قىلمىستىق ءىس بويىنشا ءىستىڭ ءمان-جايلارىن انىقتاۋعا باعىتتالعان بارلىق قاجەتتى تەرگەۋ ارەكەتتەرى جۇرگىزىلىپ جاتىر. كۇدىكتىلەرگە قاتىستى «قاماۋدا ۇستاۋ» بۇلتارتپاۋ شاراسى تاڭدالدى. قىلمىستىق ءىستىڭ تەرگەۋ ناتيجەلەرى بويىنشا تۇپكىلىكتى ءىس جۇرگىزۋ شەشىمى قابىلدانادى», – دەلىنگەن پد جاۋابىندا.

ەسكە سالايىق, 17 ناۋرىزدا ايا-سوفيا الماتى وبلىسىنىڭ كۇش اۋىلىندا جوعالىپ كەتكەن ەدى. پوليتسياعا جۇگىنگەن اناسىنىڭ ايتۋىنشا, قىز ۇيدەن شىعىپ كەتكەن, سودان بەرى ونى ەشكىم كورمەگەن.