«اناسى ءوتىندى»: قاراشوكەەۆ ەلدوس سمەتوۆتىڭ كوشەسىنە اسفالت سالىنۋ سەبەبىن ءتۇسىندىردى

فوتو: abai.kz

جامبىل وبلىسىنىڭ اكىمى ەربول قاراشوكەەۆ وليمپيادا چەمپيونى ەلدوس سمەتوۆتىڭ ءۇيىنىڭ الدىنداعى اسفالتتىڭ نەلىكتەن جانە قالاي سالىنعانىن ءتۇسىندىردى, دەپ حابارلايدى Skifnews.kz اقپارات پورتالى.

قاراشوكەەۆ سپورتشىنىڭ اۋىلىنا اسفالت توسەۋ بويىنشا مەملەكەتتىك ساتىپ الۋ پروتسەسى بەلگىلى ءبىر سەبەپتەرمەن كەشىكتىرىلىپ جاتقانىن العا تارتتى. دەگەنمەن سمەتوۆتىڭ ءۇيىنىڭ الدىنداعى جول دەمەۋشىلەر ەسەبىنەن جاسالعان ەكەن.

«جول سالۋ وڭاي پروتسەسس ەمەس. بيىل قارجىلىق سالىمدار بولدى. مەنىڭ ويىمشا, دەمەۋشىنىڭ قاراجاتى ەسەبىنەن جول جاساۋدا تۇرعان ەشتەڭە جوق. سونىمەن قاتار, مەملەكەتتىك ساتىپ الۋ پروتسەسىنىڭ ءوزى وبەكتيۆتى سەبەپتەرمەن كەشىكتىرىلگەندىكتەن, ايىپتى ەشتەڭەنى كورىپ تۇرعان جوقپىن. اۋىلعا جول قۇرىلىسىن سالۋ قاراستىرىلعان. بىراق مەملەكەتتىك ساتىپ الۋ پروتسەسى كەشىكتىرىلىپ جاتىر. سپورتشىنىڭ اتا-اناسى «قازاقستاننىڭ ەڭبەك سىڭىرگەن قايراتكەرى» اتاعىن العانىن بىلەسىزدەر. اناسى جول جاساۋدى ءوتىندى. ءبىز مەملەكەتتىك ساتىپ الۋ ءراسىمى ءجۇرىپ جاتقانىن تۇسىندىردىك, ءبىراز كۇتۋ كەرەك ەكەنىن ايتتىق. دەگەنمەن كاسىپكەرلەرىمىز كەلىپ, دەمەۋشىلىك قاراجات ەسەبىنەن چەمپيوننىڭ ايماعىنا جول سالدى. مەنىڭ ويىمشا, مۇندا تۇرعان ەشتەڭە جوق», – دەدى اكىم.

ەستەرىڭىزگە سالا كەتەيىك, بۇعان دەيىن ەلدوس سمەتوۆتىڭ اۋىلىندا اسفالت توسەيتىن مەردىگەرلەر سوتتاسىپ جاتقانىن جازعان ەدىك.