جاڭالىقتار
اناسىن ىزدەگەن جانىبەك قازاقستاندىقتاردان كومەك سۇرادى
ساۆەلەۆ اناسىن كەزدەستىرۋگە ءالى دە ءۇمىتتى ەكەنىن ايتتى.
بەلگيالىق قازاق جانىبەك ساۆەلەۆ تۋعان شەشەسىن ىزدەگەلى دە ءبىراز ۋاقىت بولدى. وكىنىشكە قاراي اناسى اناسى ءالى تابىلمادى. جانىبەك بارشا قازاقستاندىقتاردان كومەك سۇراپ, جان تەبىرەنتەرلىك ۆيدەو جاريالادى, دەپ حابارلايدى inbusiness.kz سايتىنىڭ ءتىلشىسى.
جانىبەك ساۆەلەۆ الدىمەن ءوزىنىڭ تۋعان اناسىن ىزدەۋگە ات سالىسقاندارعا العىسىن ايتتى.
«قۇرمەتتى اكەلەر, انالار, اعا-اپكەلەر! مەن 2023 جىلدىڭ سوڭىندا قازاقستانعا تۋعان انامدى ىزدەپ باردىم. سوڭعى ايلاردا ءبىز انامدى تابۋعا كومەكتەسەتىن كوپتەگەن مالىمەتكە قول جەتكىزدىك. مىسالى, «بارمىسىڭ, باۋىرىم?» رەداكتسياسى دنق زەرتتەۋلەرى ارقىلى مەن تۋعان كەزدە باسقا بالامەن اۋىسىپ كەتۋىم مۇمكىن ەكەنىن انىقتادى», – دەپ جازدى ول.
ساۆەلەۆ اناسىن كەزدەستىرۋگە ءالى دە ءۇمىتتى ەكەنىن ايتتى.
«مەنىڭ تۋعان شەشەم مەنىڭ ونىڭ تۋعان ۇلى ەكەنىمدى بىلمەيتىن شىعار, مەنىڭ وقيعامدى ەستىمەي جۇرگەن شىعار… مۇمكىن ونىڭ 2002 جىلدىڭ قاڭتارىندا دۇنيەگە كەلگەن بالاسى مەن شىعارمىن. ول قازىر مەنىڭ ورنىما اۋىسىپ كەتكەن بالانى تۋعان ۇلىم دەپ ويلاپ ءجۇرۋى دە مۇمكىن عوي», – دەيدى ساۆەلەۆ.
ول وگەي اناسى دەرتكە شالدىققانىن ايتتى.
«اناشىم, سەن ماعان كەرەكسىڭ. مەنى اسىراپ العان انام قاتتى اۋىرىپ جاتىر. ەس بىلگەلى ءسىز تۋرالى ويلاماعان ءساتىم جوق. قۇرمەتتى قازاقستاندىق اكەلەر, انالار, باۋىرلار! وتىنەمىن, وسى ۆيدەونى بارىنشا تاراتىڭىزدارشى. ءوتىنىشىم تۋعان اناما نەمەسە تۋىستارىما جەتەدى دەپ ۇمىتتەنەمىن», – دەپ جازدى ول.
