«اناسىنان باسقا دونور جوق»: 6 ايلىق سابيگە اناسى باۋىرىن كەسىپ بەرمەك

6 ايلىق نازىمعا شۇعىل كومەك كەرەك. اناسى وعان ءوز باۋىرىنىڭ جارتىسىن كەسىپ بەرمەك. بىراق, بۇل وپەراتسيانى جاساۋعا ءۇندىستاننىڭ دارىگەرلەرى عانا كەلىسكەن. ەندى اتا-انا قازاقستاندىقتاردان كومەك سۇراپ وتىر.

نازىم وتباسىنداعى ءۇشىنشى بالا. ول دۇنيەگە كەلگەندە دەنەسىندەگى سارى داققا اتا-اناسى دا, دارىگەرلەر دە اسا ءمان بەرمەپتى. الايدا, پەرزەنتحانادان ۇيگە كەلگەلى بۇل سارى داق تەك ۇلكەيە بەرگەن. دارىگەرلەرگە قايتا كەلىپ تەكسەرىلگەندە قويىلعان دياگنوزدى ەستىپ ەسەڭگىرەپ قالىپتى.

«نازىم سەرىكبايقىزىنىڭ دياگنوزى: ءوت جولدارىنىڭ اترەزياسى. باۋىردىڭ ەكىنشىلىك بيليارلى تسيرروزى, دەكومپەنساتسيا ساتىسى, Child-Turcotte-Pugh بويىنشا س كلاسى. PELD- 25 ۇپاي. تسمۆ ينفەكتسياسى, مانيفەست فورماسى. بالاعا باۋىر ترانسپلانتاتسياسى كورسەتىلەدى. قۇجاتتار قازاقستان رەسپۋبليكاسى دەنساۋلىق ساقتاۋ مينيسترلىگىنىڭ جۇمىس ورگانىنا شەتەلدە كۆوتا بويىنشا ەمدەلۋدى قاراستىرۋ ءۇشىن جىبەرىلدى», – دەپ جازعان سىزعانوۆ اتىنداعى حيرۋرگيا ۇلتتىق عىلىمي ورتالىعىنىڭ دارىگەرلەرى.

ءوت جولى بىتەۋ تۋىلعان بالانىڭ كۇن وتە باۋىرى مۇلدە ىستەن شىققان, تولىقتاي ءىرىپ كەتكەن. ءسابيدى امان الىپ قالۋعا دونور دا تابىلماعان. ەندى جاس بوسانعان اناسى تاۋەكەلگە بارماق. دارىگەرلەر اناسىنىڭ باۋىرىن كەسىپ الىپ, بالاعا سالۋعا رۇقسات بەرگەن. بالاسى مەن اناسىنا قاتار جاسالاتىن وتا ءۇندىستاننىڭ دەلي قالاسىندا جوسپارلانعان. وتاعا سىزعانوۆ اتىنداعى حيرۋرگيا ۇلتتىق عىلىمي ورتالىعى جولداما بەرگەن.

«مەملەكەت تاراپىنان جاسالاتىن كومەك تەك دەليدەگى وتاعا عانا بەرىلىپ وتىر. جات ەلدە ءۇش ايعا سوزىلاتىن ەمنىڭ وزگە دە شىعىندارى ءبىزدىڭ موينىمىزدا. وسى ۋاقىتقا دەيىن دە از شىعىن كەتپەدى. ءۇندىستاندا ەمدەلۋ, وتاعا دايىندالۋ, جاساتۋ بىزگە وتە اۋىر ءتيىپ وتىر», – دەدى نازىمنىڭ اكەسى سەرىكباي ساتىبالدى.

ايەلى مەن قىزىنا بىردەي اۋىر وتانى جاساتۋ قاراپايىم شاشتاراز بولىپ جۇمىس ىستەيتىن سەرىكبايعا اجەپتەۋىر سالماق. كۇتپەگەن قيىندىققا تاپ بولعان نازىمنىڭ اكەسى قازاقستاندىقتاردان, جاناشىر جانداردان كومەك كۇتەدى.

Kaspi Gold: 87079874087 سەرىكباي س.

كارتا نومەرى: 4400430133613304