«ءانى تالعامسىز»: باعىم مۇحيتدەنوۆا ديماش قۇدايبەرگەندى تاعى سىنادى

كەزىندە ديماش قۇدايبەرگەندى سىناعان تانىمال مۋزىكالىق پروديۋسەر باعىم مۇحيتدەنوۆا ءانشى تۋرالى ويىن تاعى ايتتى. ونىڭ سوزىنشە, بىرنەشە جىل بۇرىن ديماشقۇدايبەرگەن تۋرالى ايتقان پىكىرى ورىندى, دەپ حابارلايدى Qandastar.kz.

بۇل تۋرالى ول امان تاسىعانعا بەرگەن سۇحباتىندا ايتتى.

«12 جىل ءوتتى سوندا دا قويمايدى, مەنىڭ كۇلكىم كەلەدى. ول جەردە مەنىڭ تۇتاس ايتقان ويىم ەمەس, جاي ءبىر سويلەم تاراپ كەتتى. سودان كەيىن مەن ديماشقا جوعارى نوتالاردا ءان ايتپا دەگەندەي بولىپ قالدىم. ال مەن ءدال سول اندە شىڭعىرۋدىڭ قاجەتى جوق ەكەنىن ايتتىم. ونىڭ ورىنداعان ءانى ورتا دەڭگەيدەگى تۋىندى ەدى. مەن ءۇشىن ەشقاشان جوعارى دەڭگەيدەگى حيت ءان بولماعان. مەن ءوز ايتقان سوزىمنەن مۇلدە باس تارتپايمىن. ماعان ودان كەشىرىم سۇراۋىڭ كەرەك دەيتىندەر بار. نە ءۇشىن ەكەنىن دە تۇسىنبەيمىن. «پەسني» دەگەن كونكۋرس بار. ول جەردە ورىنداۋشى ەمەس, ءان سىنعا تۇسەدى. ديماشپەن دە سولاي بولعان. ءبىز ءان تۋرالى ايتتىق. ديماش ايتقان اندە كەرەك ەمەس دۇنيەلەر قولداندى. مەنىڭشە, ونىڭ تاڭداپ العان ءانى تالعامسىز بولدى. ول الەمدىك جۇلدىز. ءتىپتى تالقىلانبايدى دا. ال ەگەر ونىڭ تاڭداپ العان ءانى كەرەمەت بولعاندا حيتكە اينالاتىن ەدى. ولاي بولعان جوق. سوندىقتان مەنىكى دۇرىس», — دەپ تۇيىندەدى ول.