«Áni talǵamsyz»: Baǵym Muhıtdenova Dımash Qudaıbergendi taǵy synady

Kezinde Dımash Qudaıbergendi synaǵan tanymal mýzykalyq prodıýser Baǵym Muhıtdenova ánshi týraly oıyn taǵy aıtty. Onyń sózinshe, birneshe jyl buryn DımashQudaıbergen týraly aıtqan pikiri oryndy, dep habarlaıdy Qandastar.kz.

Bul týraly ol Aman Tasyǵanǵa bergen suhbatynda aıtty.

«12 jyl ótti sonda da qoımaıdy, meniń kúlkim keledi. Ol jerde meniń tutas aıtqan oıym emes, jaı bir sóılem tarap ketti. Sodan keıin men Dımashqa joǵary notalarda án aıtpa degendeı bolyp qaldym. Al men dál sol ánde shyńǵyrýdyń qajeti joq ekenin aıttym. Onyń oryndaǵan áni orta deńgeıdegi týyndy edi. Men úshin eshqashan joǵary deńgeıdegi hıt án bolmaǵan. Men óz aıtqan sózimnen múlde bas tartpaımyn. Maǵan odan keshirim suraýyń kerek deıtinder bar. Ne úshin ekenin de túsinbeımin. «Pesnı» degen konkýrs bar. Ol jerde oryndaýshy emes, án synǵa túsedi. Dımashpen de solaı bolǵan. Biz án týraly aıttyq. Dımash aıtqan ánde kerek emes dúnıeler qoldandy. Menińshe, onyń tańdap alǵan áni talǵamsyz boldy. Ol álemdik juldyz. Tipti talqylanbaıdy da. Al eger onyń tańdap alǵan áni keremet bolǵanda hıtke aınalatyn edi. Olaı bolǵan joq. Sondyqtan meniki durys», — dep túıindedi ol.