«Anıme kináli»: Almatyda shatyrdan sekirip kóz jumǵan oqýshylardyń jaqyndary ólimniń sebebin atady

Foto: ashyq derekkóz

Almatyda eki jasóspirim kópqabatty úıdiń shatyrynan qulap kóz jumǵan edi. Oqýshylardyń sýııd jasaý sebebi anıme kitap, ınternet oıyndary bolýy múmkin. Bul týraly marqumnyń týystary baıandady, – dep habarlaıdy qandastar.kz  Stan.kz-ke silteme jasap.

Qaraly jıynǵa marqumnyń jaqyndary men týǵan-týystary, mektep muǵalimderi jınaldy. Kishkentaı qyzdarynan qapyda aıyrylǵan otbasy jasóspirimdi qımastyqpen shyǵaryp saldy. Oqýshynyń týysqan aǵasy qaryndasynyń ózine qol salǵanyna sene almaıdy.

“О́z ómirine jaýapkershilik ala almaıtyn jasta, balamyz dúnıeden ozdy. Qyzymyzdyń dúnıeden ozýy óz erkimen emes, balanyń psıhıkasyna áser etetin ınternet-tehnologııanyń saldarynan boldy. Sondyqtan bundaı jaǵdaı balaǵa jasalǵan qastandyq dep esepteımiz. Bizdiń ǵana emes, barsha Qazaqstandyqtandyń basynda bolýy múmkin. Bul – balaǵa jasalǵan qylmys. Bul zulymdyqqa núkte qoıylýy kerek. Qoǵam bolyp atsalysýymyz kerek. Balanyń psıhıkasyn buzatyn dúnıeni jasaǵan jandar jazasyn alýy kerek”, – deıdi ol.

Toǵyzynshy qabatta turatyn turǵynnyń sózine sensek, qaıtys bolǵan qyzdyń birine tanysy qosymsha sabaqtan bergen. Onyń aıtýynsha oqýshy óte kóńildi, meıirimdi, ártúrli janrdaǵy kitapty súıip oqypty.

“Eki qyzdyń biri – meniń oqýshym. Kóńildi, meıirimdi, ázilqoı qyz boldy. Balerına. Úsh kúnnen beri jylap jatyrmyn. Anasymen jaqyn bolǵan. Únemi syrlasady. Ata-anasy qyzǵa óte jaqsy kóńil bóledi. Anıme kitaptaryn súıip oqydy. Arasynda qandaı kitap oqyp jatqanyn aıtatyn. Onyń kitaptaryna mán bermegenim ókinishti. Aldyn alatyn edim”, – depti tanysy Anna (aty ózgertilgen).

Turǵynnyń sózine sensek, osy oqıǵadan soń, ata-analar arasynda myna oqýlyqty balańyz oqymasyn, “qadaǵalańyz” degen habarlamalar tarap ketipti. Onymen qosa, qyzdar ólimdi romantıka etetin kitaptar men telegram kanaldarǵa tirkelgeni aıtylǵan.

On segiz jastan bastap oqýǵa ruqsat etilgen kitaptyń jasóspirimge qandaı zııany baryn psıhologtan surap kórdik.

“Kitapta qıyndyqta, qystaýda óziniń názik qalpyn saqtap qalý kerek degen metofora aıtylǵan. Jurttyń báriniń aıtyp jatqan jaman keıipkeri qaıta-qaıta ólip, tirilip, ómirdiń mánin izdeıdi. Kitaptaǵy keıipker depressııada ómir súrgen. Týra sol sekildi ómir súrip jatqan adamǵa kitap belgi bolady. Myna kitapty eresek adam oqysa, mıf ekenin túsinýi múmkin. Al jasóspirim bala oqysa, basqasha áser etýi yqtımal”, – deıdi psıholog.

Sabaq ýaqytynda shákirtteriniń syrtta júrý sebebin suramaq bolyp №25 mektep gımnazııasyna bardyq. Mektep basshylyǵy aqparat berýden bas tartty.