ء“اننىڭ تاريحى ءتيىپ كەتتى”: “نۇرلان مەن مۇرات” دۋەتىنىڭ ءانشىسى ارباعا تاڭىلعان كەزىن ەسىنە الدى

 “نۇرلان مەن مۇرات” دۋەتىنىڭ مۇشەسى نۇرلان ءامىروۆ ارباعا تاڭىلعان ءساتىن ەسكە الدى. ول بەينەبايانداعى وقيعا تاعدىرىندا قايتالانعانىن ايتتى, دەپ حابارلايدى KYN.KZ اقپارات اگەنتتىگى. 

بۇل تۋرالى ءانشى “EL.kz” Youtube ارناسىنا بەرگەن سۇحباتىندا اڭگىمەلەدى.

«حالىققا “جۇلدىزىم» ءانىنىڭ كليپى ۇنادى. ومىردەن الىنعان وقيعا. پروديۋسەرىمىزدىڭ دوسىنىڭ باسىنان وتكەن جاعداي ەكەن. سول جەلى بويىنشا تۇسىردىك. ول جىگىت قازىر قىزىمەن جاپ-جاقسى ءومىر ءسۇرىپ جاتىر ەكەن. قىزى ۇلكەن بولىپ قالعان. كەيدە بىزگە سول ءاننىڭ تاريحى تيىپ كەتتى مە دەپ تە ويلاپ قالامىن. مەن دە قاتتى اۋىرىپ, بەلىم سىنىپ, ارباعا وتىرىپ قالعان كەزىم بولدى. ءۇش-ءتورت جىلداي قاتتى قينالدىم. سول كەزدە دوستارىمنىڭ ءبارىن جوعالتىپ الدىم, ىشىمدىككە جاقىن ادامدار اينالاما جينالا باستادى, ءىشىپ كەتتىم. ونەر جايىنا قالدى. سونداي جاعداي باستان ءوتتى. مۇرات تا بەلگىسىز دەرتپەن كۇرەستى. ەكى جىلداي اۋىرىپ قالدى. ءاننىڭ تاعدىرىن ءوزىمىز سەزىنىپ كوردىك. ءبىزدىڭ دۇرىلدەگەن كەزىمىز قايدا قالدى دەپ قاتتى ويلاندىق. سول كەزدەگى دوستارىمىز قازىر جاعداي سۇراسىپ قانا قويامىز. بۇرىنعىداي ارالاسپايمىز», – دەدى نۇرلان ءامىروۆ.

ونەر يەسى اربادا وتىرعان جىلدارى سالماعىنىڭ كۇرت ارتىپ كەتكەنىن ايتتى.

“جاسىم 60-قا تاياپ قالدى. دەنساۋلىعىما ءالى كۇنگە دەيىن كۇتىم قاجەت. اربادا وتىرعان جىلدارى سالماعىم 143 كەلىگە دەيىن جەتتى. قازىر سالماعىمدى دا باقىلاۋدا ۇستايمىن. جۇرەك قاعىسىم ناشارلاپ كەتەدى. قانت ديابەتىمەن دە اۋىرامىن. جۇرەگىم شانشىپ, قانشاما رەت جان ساقتاۋ بولىمىنە جاتىپ شىقتىم. جۇرەگىمە سوعىسىن جاقسارتاتىن التى قۇرىلعى قويدى. كوپ ۋاقىت اۋرۋحانادا جاتتىم. سودان سالماعىم 100 كەلىگە ءتۇستى. ديەتانىڭ ارقاسىندا سالماق تاستادىم”, – دەدى ءانشى.