“Ánniń tarıhy tıip ketti”: “Nurlan men Murat” dýetiniń ánshisi arbaǵa tańylǵan kezin esine aldy

 “Nurlan men Murat” dýetiniń múshesi Nurlan Ámirov arbaǵa tańylǵan sátin eske aldy. Ol beınebaıandaǵy oqıǵa taǵdyrynda qaıtalanǵanyn aıtty, dep habarlaıdy KYN.KZ aqparat agenttigi. 

Bul týraly ánshi “EL.kz” Youtube arnasyna bergen suhbatynda áńgimeledi.

«Halyqqa “Juldyzym» ániniń klıpi unady. О́mirden alynǵan oqıǵa. Prodıýserimizdiń dosynyń basynan ótken jaǵdaı eken. Sol jeli boıynsha túsirdik. Ol jigit qazir qyzymen jap-jaqsy ómir súrip jatyr eken. Qyzy úlken bolyp qalǵan. Keıde bizge sol ánniń tarıhy tıip ketti me dep te oılap qalamyn. Men de qatty aýyryp, belim synyp, arbaǵa otyryp qalǵan kezim boldy. Úsh-tórt jyldaı qatty qınaldym. Sol kezde dostarymnyń bárin joǵaltyp aldym, ishimdikke jaqyn adamdar aınalama jınala bastady, iship kettim. О́ner jaıyna qaldy. Sondaı jaǵdaı bastan ótti. Murat ta belgisiz dertpen kúresti. Eki jyldaı aýyryp qaldy. Ánniń taǵdyryn ózimiz sezinip kórdik. Bizdiń dúrildegen kezimiz qaıda qaldy dep qatty oılandyq. Sol kezdegi dostarymyz qazir jaǵdaı surasyp qana qoıamyz. Burynǵydaı aralaspaımyz», – dedi Nurlan Ámirov.

О́ner ıesi arbada otyrǵan jyldary salmaǵynyń kúrt artyp ketkenin aıtty.

“Jasym 60-qa taıap qaldy. Densaýlyǵyma áli kúnge deıin kútim qajet. Arbada otyrǵan jyldary salmaǵym 143 kelige deıin jetti. Qazir salmaǵymdy da baqylaýda ustaımyn. Júrek qaǵysym nasharlap ketedi. Qant dıabetimen de aýyramyn. Júregim shanshyp, qanshama ret jan saqtaý bólimine jatyp shyqtym. Júregime soǵysyn jaqsartatyn alty qurylǵy qoıdy. Kóp ýaqyt aýrýhanada jattym. Sodan salmaǵym 100 kelige tústi. Dıetanyń arqasynda salmaq tastadym”, – dedi ánshi.