ءانشى ديماش سوعىستا قاي تاراپتى قولدايتىنىن مالىمدەدى

فوتو: اشىق دەرەككوز

الەمگە ايگىلى ونەر جۇلدىزى ديماش قۇدايبەرگەن استاناداعى كونتسەرتى كەزىندە سوعىس تۋرالى پىكىر ءبىلدىردى, دەپ حابارلايدى qandastar.kz Ulysmedia.kz سىلتەمە جاساپ.

ديماش كەزەكتى ءانىن ورىنداعان سوڭ كورەرمەندەرگە ءوزىنىڭ سوعىس جايلى ويىن ءبولىستى. ول الەمدە جۇرەكتى ەلجىرەتەتىن, ۇزاق تالقىلاۋدى قاجەت ەتەتىن كەلەڭسىز جايتتار كوپتەپ ورىن الىپ جاتقانىنا وكىنىش ءبىلدىردى.

“وسى ورايدا مەن تۇسىنبەيتىن ءبىر عانا نارسە بار. وسىدان بىرنەشە جىل بۇرىن جانە مىنا بەرتىندە دە شەتەلدىك جۋرناليستەر مەنەن كوبىنە “ەكى ەل سوعىسىپ جاتسا قاي جاققا بولىساسىز?” دەپ سۇرايدى.

ەكى ەلدە سوعىس بولىپ جاتقان جاعدايدا ءبىر ەلدىكى دۇرىس بولسىن, ەكىنشىسىنىكى بۇرىس بولسىن, نە ىستەسەڭىزدەر دە, ارالارىڭىزدا كەلىسپەيتىندەر بولسا دا مەن ەشكىمدى قولداي المايمىن. ويتكەنى انا جاقتان دا, مىنا جاقتان دا سابيلەر ولەدى”, دەدى ديماش قۇدايبەرگەن.

ەسكە سالا كەتسەك, دۇنيەجۇزىلىك كوشپەندىلەر ويىندارى اياسىندا 13 قىركۇيەك كۇنى استانادا الەمگە ايگىلى قازاق ءانشىسى ديماش قۇدايبەرگەن «استانا ارەنا» ستاديونىندا ءوزىنىڭ العاشقى جەكە كونتسەرتىن وتكىزدى. ديماشتىڭ كونتسەرتى بۇگىنگە دە جوسپارلانعان.

ەلورداداعى كونتسەرتكە ادەتتەگىدەي ءانشىنىڭ الەمنىڭ ءار تۇپكىرىندەگى جانكۇيەرلەرى كەلدى.