Ánshi Syrym Isabaev nemen aınalysyp júr?

Foto: ashyq derekkóz

Tanymal prodıýser Gúlzıra Aıdarbekova ánshi Syrym Isabaevqa qatysty suraqqa jaýap berdi. Art-dırektor, Qaırat Nurtastyń anasy Gúlzıra Úsenqyzy kezinde sahnaǵa shyǵarǵan Syrym Isabaevqa qatysty sóz qozǵady, dep habarlaıdy Skifnews.kz aqparat portaly.

“Men kóp adamnyń sahnaǵa shyǵýyna yqpal ettim. Syrym men Baqyt Altaı boldy. Olarmen de jaqsy jumys istedik. “Syrymdy qurtyp jiberdi” degen áńgime tarady. Men olaı adamdy jutyp jiberetin anakonda emespin. Tipti, Qaırat Nurtastan góri Syrymdy maǵan uqsatatyn. Biz eshqashanda urysyp, renjisken emespin. Daýys kóterip sóılep kórmedim. Qaırat ekeýi keremet ánder jazdy. Halyqqa taralyp, toılarǵa shyqty. Biraq Syrym “Men joq bolyp ketip, qaıtadan jarqyrap shyqqym keledi” degendi jıi aıtty. Sosyn dinge bet buryp, namaz oqı bastady. Bızneske qyzyqty. Solaı óziniń tańdaýymen ketti. Adam ne aıtsa sol oryndalady eken. Syılastyǵymyz úzilgen joq. Jaqynda Shymkenttegi biz túsken qonaq úıge kelip, amandasyp ketti. Sol kezde ónerge qaıtadan kelgisi keletinin aıtyp qaldy”, – dedi prodıýser.

Sondaı-aq prodıýser aty shyqqannan keıin ózgerip shyǵa keletin óner ókilderine qatysty da pikir bildirdi.

“Adam ataǵy shyqqasyn ózgerip sala beredi. Tákapparlyǵyn kórsetip, prodıýserge baǵynbaı ketetin kezi bolady. Kezinde “AlZaBı” degen topty qurdym. Ǵumyry uzaqqa barmady. О́ıtkeni top músheleri bir úıdiń erkeleri edi. Onyń quramynda ulym Zańǵar da boldy. Menmendigi bastalyp, aıtqanǵa kónbeıtindi shyǵardy. Sodan “qoıa salyńdar” dedim. Áýelde Zańǵar toptyń quramynda óner kórsetkim keledi degesin, qurǵan edik. Biraq meniń tarapymnan olarǵa qysym bolǵan emes. Áli kúnge deıin balalarym sekildi jaqsy kóremin”, – dedi art-dırektor.