ءانشى تۇراردىڭ بولاشاق ايەلى جايلى ءسوزى كوپتى ويلاندىرىپ قويدى

فوتو:instagram.com/turar__ydyry

ءانشى تۇرار ىدىرىس YouTube-تاعى «سىر» جوباسىنا بەرگەن سۇحباتىندا جەكە ءومىرى مەن وتباسى تۋرالى ايتتى, دەپ جازدى qandastar.kz

ول ايەلى مەن تۋىستارى اراسىنداعى قارىم-قاتىناس قانداي بولۋ كەرەگىن جەتكىزدى. ءانشىنىڭ ايتۋىنشا, ەر ادام وتباسى قۇرعاندا الدىمەن ايەلىنە قامقورلىق تانىتىپ, تۋىستارىنىڭ ونىڭ جەكە ومىرىنە ارالاسۋىنا جول بەرمەۋى كەرەك.

«مەن ۇيدەگىلەرگە ايتىپ قويعانمىن: «مەنىڭ ايەلىمە ەشتەڭە دەمەيسىڭدەر. ول جاتادى, بويانادى, نە ىستەيدى, ءوزى بىلەدى» دەپ ايتقانمىن. سوندىقتان مەنىڭ ايەلىم اياعىن كوتەرىپ قويىپ جاتادى. …بىرىنشىدەن, ول – مەنىڭ ايەلىم. ول – كەلىن ەمەس, الدىمەن مەنىڭ جۇبايىم. ەگەر سەن اپكەلەرىڭنىڭ, اكە-شەشەڭنىڭ ايتقانىمەن جۇرەتىن بولساڭ, ۇيلەنبە. كولىك العاندا اكەڭمەن, كۋرتكا العاندا اناڭمەن اقىلداسىپ جۇرسەڭ, ۇيلەنبە. انانىڭ, اپكەنىڭ ارالاسۋى سودان بولادى. ال سەن دايىن بولىپ ۇيلەندىڭ بە, تۋىستارىڭ سەنىڭ قۇرعان وتباسىڭا مۇلدەم ارالاسپاۋى كەرەك قوي», – دەيدى ول.

ونەر يەسىنىڭ بۇل پىكىرى قوعامدا قىزۋ تالقىلانىپ جاتىر. كەيبىرەۋلەر ونىڭ پىكىرىن قولداسا, وزگەلەرى ونىڭ ۇستانىممەن ءومىر سۇرەتىنىنە كۇمانمەن قاراعان.