ءانشى جۇبانىش جەكسەن ۇلى اۋەجايدا ايەلدى بالاعاتتاعانى ءۇشىن سوت الدىندا جاۋاپ بەردى

فوتو: اشىق دەرەككوز

استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىندا ءانشى جۇبانىش جەكسەن ۇلىنا قاتىستى ۇساق بۇزاقىلىق بويىنشا اكىمشىلىك ءىس قارالدى, دەپ حابارلايدى qandastar.kz Dalanews.kz-كە سىلتەمە جاساپ.

سوت ماتەريالدارىنا سايكەس, وقيعا 21 شىلدە كۇنى تۇنگى ساعات 00:30 شاماسىندا ەلوردانىڭ حالىقارالىق اۋەجايىندا بولعان. ءانشى ازاماتشا س.-عا بالاعات سوزدەر ايتىپ, قوعامدىق تارتىپكە نۇقسان كەلتىرگەن جانە اينالاداعى ادامدارعا قۇرمەتسىزدىك تانىتقان.

سوت وتىرىسىندا جەكسەن ۇلى ءوز ارەكەتىن مويىنداپ, سول ساتتە ەموتسياعا بەرىلگەنىن, ىستەگەن ىسىنە وكىنىپ, كەشىرىم سۇرايتىنىن مالىمدەدى. جابىرلەنۋشى تاراپ ازاماتشا س. وقيعانىڭ راسىمەن بولعانىن راستادى.

قۇقىق بۇزۋشىلىق فاكتىسى ءىس ماتەريالدارى, حاتتاما, قۇقىق بۇزۋشى مەن جابىرلەنۋشىنىڭ تۇسىنىكتەمەلەرى, كۋاگەرلەردىڭ ايعاقتارى جانە بەينەجازبالارمەن دالەلدەنگەن.

اكىمشىلىك قۇقىق بۇزۋشىلىق تۋرالى كودەكستىڭ 434-بابى 1-بولىگىنە سايكەس, مۇنداي ارەكەت ءۇشىن 20 ايلىق ەسەپتىك كورسەتكىش (اەك) كولەمىندە ايىپپۇل سالۋ نەمەسە 5-تەن 15 تاۋلىككە دەيىن اكىمشىلىك قاماققا الۋ جازاسى قاراستىرىلعان.

سوت جۇبانىش جەكسەن ۇلىنىڭ كىناسىن مويىنداۋى مەن وكىنۋىن جازانى جەڭىلدەتەتىن, ال وقيعا كەزىندە الكوگولدىك ىشىمدىك ىشكەنىن اۋىرلاتاتىن ءمان-جاي رەتىندە ەسكەرىپ, وعان 20 اەك كولەمىندە, ياعني 78 640 تەڭگە ايىپپۇل سالۋ تۋرالى شەشىم شىعاردى.

سوت قاۋلىسى ءالى زاڭدى كۇشىنە ەنگەن جوق.