انتيكور 17 وبلىستا ديپلومى جوق جاتتىقتىرۋشىلاردى انىقتادى

فوتو: اشىق دەرەككوز

سىبايلاس جەمقورلىققا قارسى ءىس-قيمىل اگەنتتىگى تۋريزم جانە سپورت مينيسترلىگىمەن بىرلەسىپ, سپورتتى قارجىلاندىرۋ سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى, دەپ جازادى qandastar.kz

17 وبلىستا جاتتىقتىرۋشىلىق, پەداگوگيكالىق جانە سپورتتىق قىزمەتتى جۇزەگە اسىراتىن جالعان مامانداردىڭ جالعان ديپلومداردى پايدالانۋىنىڭ 265-تەن استام فاكتىسى انىقتالدى. قازىردىڭ وزىندە 188 ءتارتىپ بۇزۋشىنىڭ ەڭبەك شارتى بۇزىلعان.

16 وبلىستا جالاقى قورىنداعى بيۋدجەت قاراجاتىن, ءىسساپار شىعىندارىن, جالعان سپورتتىق ءىس-شارالاردى وتكىزۋ جانە ت.ب. ۇرلاۋ بەلگىلەرى بار فاكتىلەر انىقتالدى. جىل باسىنان بەرى 64 قىلمىس تىركەلىپ, 1,6 ملرد تەڭگەنى قۇراعان شىعىندى قۇرادى. بۇگىنگى تاڭدا 23 ادام سوتتالىپ, وتەماقى تولەنىپ, 548 ميلليون تەڭگەنىڭ مۇلكى تاركىلەندى.

كەيبىر كلۋبتار ميلليونداعان سىياقى بەرگەن. وسىلايشا, اقتوبە وبلىسىندا «اقتوبە وڭىرلىك فۋتبول كلۋبى» اق باسقارما توراعاسى دەمەۋشى تارتقان («NetBet» جشس, «وليمپبەت» ساۋدا بەلگىسى) ءۇشىن وزىنە 40,4 ميلليون تەڭگە كولەمىندە سىياقىنى نەگىزسىز تولەگەن. بارلىق سومانى سوت ارقىلى ءوندىرىلدى. بۇل قارجى وبلىستا بالالار فۋتبولىن دامىتۋعا جۇمسالماق.

فۋتبولدى دامىتۋعا ميللياردتاعان دوللار قارجى ۋەفا, فيفا جانە بۋكمەكەرلىك كومپانيالاردان دا تۇسەدى. سوڭعى 6 جىلدا (2018-2023) وتاندىق كلۋبتار ۋەفا مەن فيفا ارقىلى 31 ملرد تەڭگەگە جۋىق قاراجات العان. سونىمەن بىرگە قارجى رەسۋرستارىن ءبولۋ جانە جۇمساۋ تۋرالى اقپارات جەتكىلىكسىز اشىقتىق كۇيىندە قالىپ وتىر.

تالداۋ ناتيجەلەرى كورسەتكەندەي, ميللياردتاعان بيۋدجەت قاراجاتى جەكە ينفراقۇرىلىمدى قۇرۋدىڭ ورنىنا ءونىمسىز لەگيونەرلەردى ۇستاۋعا, شەتەلدىك الىمدارعا, قىمباتتاعان تولەمدەرگە, قىمبات اگەنتتىك جانە باسقا قىزمەتتەردى ساتىپ الۋعا جۇمسالادى.