انتيكور الماتىدا 2 ملرد تەڭگەگە باعالانعان ءزاۋلىم ءۇيدىڭ يەسىن تەكسەرەتىن بولدى

فوتو: istockphoto.com

ول سىبايلاس جەمقورلىققا قارسى قىزمەت باستىعىنىڭ بۇرىنعى ورىنباسارى دەگەن ءسوز بار.

سىبايلاس جەمقورلىققا قارسى قىزمەت الماتىنىڭ تاۋ بوكتەرىندەگى بۇرىنعى شەنەۋنىككە تيەسىلى بولۋى مۇمكىن ءزاۋلىم ءۇيدى ساتۋ تۋرالى اقپاراتتى زەرتتەمەك, دەپ حابارلايدى  qandastar.kz  Halyq Uni-نە سىلتەمە جاساپ.

بۇعان دەيىن الەۋمەتتىك جەلىلەردە سىبايلاس جەمقورلىققا قارسى قىزمەت باستىعىنىڭ ەكس-ورىنباسارى زايىبىنىڭ الماتىدا وتباسىلىق ءزاۋلىم ءۇيدى ساتىلىمعا شىعارعانى تۋرالى اقپارات پايدا بولدى. ونىڭ قۇنى 2 ميلليارد تەڭگەگە باعالانعان.

ءماجىلىس كۋلۋارىندا جۋرناليستەر انتيكور توراعاسىنىڭ ءبىرىنشى ورىنباسارى ۇلان سارقۇلوۆتان بۇل ءۇي شىنىمەن دە بۇرىنعى ارىپتەسىنىڭ وتباسىنا تيەسىلى مە دەگەن سۇراق قويدى.

ءبىز دە وسى جازبانى كوردىك. بىزدە ءتيىستى ءبولىم بار, بۇل ماسەلەمەن اينالىسادى. ەكىنشىدەن, مەن بىردەن اتاپ وتكىم كەلەدى, مۇندا ءبىز دە ءتۇسىنۋىمىز كەرەك, ەگەر بۇل دەكلاراتيۆتى, ياعني ءتيىستى تۇردە تىركەلگەن بولسا, زاڭنامالىق ماسەلەلەر بار. بىرەۋ بيزنەسپەن اينالىسقان, نە باسقا بولسا, ءبىز دە جەكەمەنشىك قۇقىعىن قۇرمەتتەۋىمىز كەرەك. بۇل ماسەلە زەرتتەلەتىن بولادى, – دەپ جاۋاپ بەردى ۇلان سارقۇلوۆ.

سونداي-اق ول انتيكوردىڭ قىمبات مۇلكى بار قىزمەتكەردىڭ قانداي لاۋازىمدا بولعانىنا قاراماستان بۇل ىسكە قۇقىقتىق باعا بەرەتىنىن اتاپ ءوتتى.