انتيكور باسشىسى: شەنەۋنىكتەردىڭ اشكوزدىگى ەلدىڭ دامۋىنا كەدەرگى

فوتو: اشىق دەرەككوز

شەنەۋنىكتەردىڭ اشكوزدىگى ەلدىڭ دامۋىن تەجەيتىن باستى كەدەرگىنىڭ ءبىرى. بۇل تۋرالى «ۇادە» باعدارلاماسىنىڭ ەفيرىندە انتيكور توراعاسى اسحات جۇماعالي مالىمدەدى, دەپ جازدى qandastar.kz

ونىڭ ايتۋىنشا, جەمقورلىق قازاقستاندا الەۋمەتتىك قۇبىلىسقا اينالىپ كەتكەن. 

مەملەكەت وسى باعىتتا زاڭنامالىق نەگىزدى كۇشەيتۋ ءۇشىن ءتيىستى قادامدار جاساۋدا. قابىلدانعان انتيكوررۋپتسيالىق ساياسات تۇجىرىمداماسىنا بارلىق مەمورگان جۇمىلدىرىلعان. 

«ۇلتتىق بانك جانە قارجى مينيسترلىگىمەن بىرلەسە وتىرىپ, بيۋدجەت قاراجاتىنىڭ ۇرلانۋىن بولدىرماۋ باعىتىندا جاڭا تاسىلدەر ەنگىزىلۋدە. تسيفرلاندىرۋعا نەگىزدەلگەن قۇرالدار ارقىلى بيۋدجەت قارجىسىنىڭ قوزعالىسىن باقىلايتىن جۇيە قۇرىلىپ وتىر», – دەيدى ول.

اشكەرە تەلەگرام ارناسى جازعانداي, شاتاڭ جازالاۋ شارالارى دا نازاردان تىس قالماعان. 

ەرەكشە ءىرى كولەمدە پارا العان ادام 15 جىلعا دەيىن باس بوستاندىعىنان ايىرىلۋى مۇمكىن. بۇعان قوسا, جەمقور شەنەۋنىك شارتتى تۇردە مەرزىمىنەن بۇرىن بوساپ شىعا المايدى. ونداي ادامنىڭ مەملەكەتتىك قىزمەتكە جانە كۆازيمەملەكەتتىك سەكتورعا قايتا ورالۋىنا زاڭ جۇزىندە تىيىم سالىنعان. 

جۇماعاليدىڭ ايتۋىنشا, حالىقتىڭ ءوتىنىشى مەن الەمجەلىدەگى سيگنالدار ماڭىزدى اقپارات كوزدەرىنە اينالعان. بۇدان بولەك, اگەنتتىك قازىرگى كەزدە بيۋدجەت قارجىسىن ناقتى قاداعالاۋ ماقساتىندا «تسيفرلىق تەڭگە» جوباسىن قولعا الىپتى. مۇنىڭ ەرەكشەلىگى نەدە? 

«مۇندا ءاربىر تەڭگەنىڭ قانداي تاۋارعا نەمەسە قىزمەتكە جۇمسالعانى باقىلانادى. بۇرىن بولىنگەن قاراجاتتى جالعان فيرمالار ارقىلى قولما-قول شىعارىپ الۋ امالدارى قولدانىلسا, ەندى تسيفرلىق تاڭبالاۋ مەحانيزمىنىڭ ارقاسىندا قارجىنىڭ بۇكىل قوزعالىسى تىركەلىپ وتىرادى», – دەيدى ول.

اگەنتتىك بۇل ءتاسىلدى بىلتىر «دوستىق – مويىنتى» تەمىرجول قۇرىلىسىندا سىناقتان وتكىزگەن ەكەن, ءسويتىپ 160 ملرد تەڭگە باقىلاۋعا الىنعان. 

اتىراۋ وبلىسىنداعى جول سالۋ جوباسى دا ءدال وسىنداي سحەماعا قوسىلىپ, مەردىگەرلەر بارلىق شىعىنىن اشىق كورسەتۋگە كەلىسىم بەرگەن.

جۇماعالي اگەنتتىك قىزمەتىنىڭ تۇپكى ماقساتى – ازاماتتاردىڭ ءال-اۋقاتى مەن ءومىر ساپاسىن جاقسارتۋ ەكەنىن ەسكە سالىپ وتىر. ايتۋىنشا, ءتۇرلى رەيتينگتەردە قازاقستاندى جاقسى قىرىنان كورسەتۋ جەتكىلىكسىز, قاراپايىم تۇرعىنداردىڭ جەمقورسىز ورتادا ءومىر سۇرۋىنە جاعداي جاساۋ ماڭىزدى. 

سااكاشۆيلي? اسحات جۇماعالي وسى رەتتە گرۋزيانىڭ تاجىريبەسىن ۇلگى رەتىندە ۇسىنۋدا. 

«گرۋزيندەر كەزىندە مەمقۇرىلىمدار مەن قۇقىق قورعاۋ ورگاندارىندا اۋقىمدى رەفورما (تازالاۋ) جۇرگىزدى. ءبىز دە وسىنداي ىستەردى قولعا الىپ جاتىرمىز, كەي تۇستاردا ودان دا اۋقىمدى قادامدارعا بارىپ وتىرمىز. كەز كەلگەن ىستە ادىلەتتىڭ سالتانات قۇرۋى, جازالاۋدىڭ زاڭمەن بەكىتىلگەن شەگىنەن اسپاۋى اگەنتتىكتىڭ وزگەرمەس ءپرينتسيپى بولماق», – دەيدى ول