انتيكور زاڭسىز اكتيۆتەن تۇسكەن قارجى قايدا جۇمسالاتىنىن ايتتى

فوتو: اشىق دەرەككوز

بيىل زاڭسىز اكتيۆتەن تۇسكەن قاراجاتقا 18 جاڭا مەكتەپ سالىندى, دەپ جازدى qandastar.kz

ونىڭ باسىم بولىگى استانا قالاسىندا جانە ماڭعىستاۋ, الماتى, جامبىل وبلىستارىندا تۇرعىزىلدى. جاڭا نىساندار ءۇش اۋىسىمدى, اپاتتى جانە ەسكى مەكتەپتەگى ورىن تاپشىلىعى ماسەلەسىن شەشۋگە مۇمكىندىك بەردى. 

جالپى 83 مەكتەپتىڭ قۇرىلىسىنا 153 ملرد تەڭگە باعىتتالعان. سونىڭ 56-سى قولدانىسقا بەرىلگەن. 2025 جىلى تاعى 17 ءبىلىم ورداسىن سالۋ كوزدەلگەن. 

“اگەنتتىك 2022 جىلدان باستاپ مەملەكەت پەن كۆازيمەملەكەتتىك سەكتور سۋبەكتىلەرىنە 1 تريلليون 100 ملرد تەڭگەدەن استام سوماسىندا م ۇلىكتىك اكتيۆتەر مەن قاراجاتتىڭ قايتارىلۋىن قامتاماسىز ەتتى, ولاردان 321,6 ملرد تەڭگە اقشا قاراجات تىكەلەي بيۋدجەتكە قايتارىلدى”, – دەدى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بەگايداروۆ. 

سونداي-اق قايتارىلعان زاڭسىز اكتيۆتەردىڭ ىشىندە بيزنەس جانە ليۋكس نىساندار بار. بۇگىندە باسىم بولىگىن ءبىلىم بەرۋ مەكەمەلەرى پايدالانىپ وتىر.

الماتىداعى «Maisat» بيزنەس ورتالىعى «گەوگرافيا جانە سۋ قاۋىپسىزدىگى  ينستيتۋتى»-نىڭ مەنشىگىنە اۋدارىلدى. «Kaisar Tower» ورتالىعى «قازاق ۇلتتىق قىزدار پەداگوگيكالىق ۋنيۆەرسيتەتىنە» بەرىلدى. اقمولا وبلىسىنداعى رەزيدەنتسيا 135 گەكتار جەر ۋچاسكەسىمەن بىرگە استانا قالاسىنىڭ ءبىلىم باسقارماسىنا ءوتتى. ول جەردە بالالارعا ارنالعان دەمالىس ورنىن اشۋ جوسپارلانعان.