جاڭالىقتار
«AntiTrash»: جاڭا ادامدار استاناداعى قۇرىلىس كومپانيالارىنا ۇندەۋ جاسادى

فوتو: ۆيدەودان سكرين
استانادا جاڭا ادامدار ۇلى دالا داڭعىلىنداعى «ايۆا» تۇرعىن ءۇي كەشەنى ماڭىندا زاڭسىز قۇرىلىس جانە تۇرمىستىق قالدىقتار تاستالاتىن قوقىس الاڭىن انىقتادى, دەپ جازدى qandastar.kz
كۇن سايىن ونداعان جۇك كولىگى قوقىس توگىپ, اۋداننىڭ ەكولوگياسى مەن تۇرعىندارىنىڭ دەنساۋلىعىنا ۇلكەن قاۋىپ توندىرۋدە. باستاپقىدا بيزنەس-ورتالىق سالۋعا ارنالعان بۇل اۋماق ءىس جۇزىندە قوقىس الاڭىنا اينالعان. ساراپشىلار بۇل قوقىس توگۋدىڭ زاڭسىز ەكەنىن جانە قورشاعان ورتاعا ورنى تولماس زيان كەلتىرۋى مۇمكىن ەكەنىن راستاپ وتىر.
جاڭا ادامداردىڭ «AntiTrash» ازاماتتىق ناۋقانىنىڭ بەلسەندىلەرى بۇل جاعدايعا جاۋاپتى تۇلعالار مەن قوقىس الاڭىنداعى جۇمىسشىلاردان جاۋاپ الۋعا تىرىستى, الايدا جاۋاپ ورنىنا بالاعاتتاۋ مەن اگرەسسياعا تاپ بولدى. سونىمەن قاتار بۇل جەرگە باسقا قۇرىلىس نىساندارىنان دا قوقىس جەتكىزىلەتىنى انىقتالدى, بۇل زاڭسىز قالدىقتاردى توگۋدىڭ تۇتاس جۇيەسى بار ەكەنىن دالەلدەيدى. بۇل جاعداي قانشالىقتى ۋشىعۋى مۇمكىن?
جاڭا ادامدار قۇرىلىس الاڭدارىنان قالدىقتار وسى زاڭسىز قوقىس ۇيىندىسىنە جەتكىزىلەتىن Wien Deluxe جانە BI Group قۇرىلىس كومپانيالارىن ءوز مەردىگەرلەرىنىڭ قىزمەتىن مۇقيات تەكسەرۋگە شاقىرادى. سونداي-اق, ەسىل اۋدانى اكىمىنىڭ ورىنباسارى نۇگەربەكوۆ ماديار جۇماباي ۇلىنا جولداۋ جاساپ, بۇل ىسكە ارالاسىپ, شۇعىل شارا قابىلداۋىن ءوتىندى.
«AntiTrash» ازاماتتىق ناۋقانىنىڭ بەلسەندىلەرى استانالىقتاردى شەتتە قالماۋعا شاقىرادى: زاڭبۇزۋشىلىقتاردى انىقتاپ, زاڭسىز قوقىس تاستاۋدىڭ الدىن الىپ, بيلىكتەن ناقتى شەشىمدەر تالاپ ەتىڭىزدەر. استانانىڭ تازالىعى – ءبارىمىزدىڭ ورتاق جاۋاپكەرشىلىگىمىز!