Jańalyqtar
«AntiTrash»: Jańa adamdar Astanadaǵy qurylys kompanııalaryna úndeý jasady

Foto: vıdeodan skrın
Astanada Jańa adamdar Uly Dala dańǵylyndaǵy «Aıva» turǵyn úı kesheni mańynda zańsyz qurylys jáne turmystyq qaldyqtar tastalatyn qoqys alańyn anyqtady, dep jazdy qandastar.kz
Kún saıyn ondaǵan júk kóligi qoqys tógip, aýdannyń ekologııasy men turǵyndarynyń densaýlyǵyna úlken qaýip tóndirýde. Bastapqyda bıznes-ortalyq salýǵa arnalǵan bul aýmaq is júzinde qoqys alańyna aınalǵan. Sarapshylar bul qoqys tógýdiń zańsyz ekenin jáne qorshaǵan ortaǵa orny tolmas zııan keltirýi múmkin ekenin rastap otyr.
Jańa adamdardyń «AntiTrash» azamattyq naýqanynyń belsendileri bul jaǵdaıǵa jaýapty tulǵalar men qoqys alańyndaǵy jumysshylardan jaýap alýǵa tyrysty, alaıda jaýap ornyna balaǵattaý men agressııaǵa tap boldy. Sonymen qatar bul jerge basqa qurylys nysandarynan da qoqys jetkiziletini anyqtaldy, bul zańsyz qaldyqtardy tógýdiń tutas júıesi bar ekenin dáleldeıdi. Bul jaǵdaı qanshalyqty ýshyǵýy múmkin?
Jańa adamdar qurylys alańdarynan qaldyqtar osy zańsyz qoqys úıindisine jetkiziletin Wien Deluxe jáne BI Group qurylys kompanııalaryn óz merdigerleriniń qyzmetin muqııat tekserýge shaqyrady. Sondaı-aq, Esil aýdany ákiminiń orynbasary Núgerbekov Madııar Jumabaıulyna joldaý jasap, bul iske aralasyp, shuǵyl shara qabyldaýyn ótindi.
«AntiTrash» azamattyq naýqanynyń belsendileri astanalyqtardy shette qalmaýǵa shaqyrady: zańbuzýshylyqtardy anyqtap, zańsyz qoqys tastaýdyń aldyn alyp, bılikten naqty sheshimder talap etińizder. Astananyń tazalyǵy – bárimizdiń ortaq jaýapkershiligimiz!