Ár balaǵa 70 myń teńgeden járdemaqy tóleý týraly: Eńbek mınıstrligi ne sheshti

Elimizde 1,5 jasqa tolǵanǵa deıingi bala kútimi boıynsha aı saıynǵy járdemaqynyń mólsheri shamamen 22 myń teńgeni quraıdy. Depýtattar buǵan deıin bul tólem kólemin 70 myń teńgege deıin ósirýdi usynǵan bolatyn. Tólegen Ospanqulov búginderi «bir balaǵa 22 myń tólenetinin» rastady.

«Biraq bul rette ekinshi, úshinshi, tórtinshi balaǵa kelgende, bul tólem somasy ósip otyrady, biraq, 70 myńdy quramaıdy, árıne. Búgingi tańda bizdiń mınıstrlikpen tólemderdiń 41 túri jasalady. Osy tólemderdiń barlyǵyn óteý úshin bizge respýblıkalyq bıýdjetten shamamen 5,2 mlrd teńge qajet», – dedi ol.

Zakon.kz jazǵandaı, vedomstvo esep jasap, eger árbir balaǵa 70 myń teńgeden tólense, onda qazirgi balalar sanyna shaqqanda tólemderdi jasaýǵa 5,7 trln teńge qajet bolatynyn anyqtaǵan.

«Bul baǵytta jumystar júrgizilip jatyr, biraq búgingi tańda bul salyq tóleýshilerdiń aqshasy ekenin eskersek, biz bul somany zoraıta almaımyz dep oılaımyn», – dep sózin qorytyndylady Tólegen Ospanqulov.